Abaregwa barimo umuyobozi w’ishuri, uwabaye umucungamutungo n’uwamusimbuye n’uwari ushinzwe amasomo muri iri shuri.             

Ku wa 2 Ugushyingo 2026, abaregwa uko ari bane bitabye Urukiko Rwisumbuye rwa Karongi ngo baburane mu mizi.  

Umucungamutungo yahise azamura ikiganza avuga ko atiteguye kuburana kuko adafite umwunganizi gusa avuga ko mu minsi ine yaba yamubonye.                                  

Perezida w'iburanisha yamubajije niba atari azi ko afite urubanza, undi avuga ko yari abizi ariko atari azi itariki.     

Uhagarariye ubushinjacyaha yavuze ko ari uburenganzira bw'uregwa kuburana yunganiwe, asaba urukiko ko rwasubika urubanza. 

Uwahoze ari umucungamutungo n’ushinzwe amasomo bavuze ko biteguye kuburana ariko ko urubanza rutakomeza mugenzi wabo adafite umwavoka.

Basabye urukiko gusubika urubanza ariko rukaruha itariki ya hafi.

Muri Gicurasi 2026 nibwo RIB yatangaje ko yataye muri yombi abaregwa uko ari bane, bakekwaho icyaha cyo kunyereza umutungo ufitiye rubanda akamaro. 

Ni nyuma y'aho iperereza ry’ibanze ryagaragaje ko hari amafaranga angana na 226.790.877 Frw yanyerejwe. 

Urukiko rwanzuye ko iburanisha rizakomeza tariki 1 Ukuboza 2026.