Umunyamerika Miley Ray Cyrus, uzwi nka Miley Cyrus mu muziki no muri sinema, agiye gushyingiranwa n’umukunzi we, Maxx Morando, mu mpera z’iki cyumweru.
TMZ n’abantu ba hafi yabo bavuze ko Miley Cyrus n’uyu mukunzi we, na we usanzwe ari umunyamuziki wandika akanatunganya indirimbo, bazakorera ubukwe mu gace ka California y’Amajyepfo, gaherereye muri Leta ya California, muri Leta Zunze Ubumwe za Amerika.
Miley Cyrus asa n’uwari waraciye amarenga ku by’ubukwe bwe. Mu kwezi gushize yazamuye uyu mukunzi we ku rubyiniro mu gitaramo yataramyemo cya Hollywood Bowl, dore ko uyu mugabo yamutunganyirije nyinshi mu ndirimbo ze.
Icyo gihe, bafatanyije kuririmba indirimbo ya Miley Cyrus yitwa ‘Let's Get Married’, ivuga ngo ‘Dushyingiranwe’. Ni indirimbo nshya iri kuri album ye ya 10 yise ‘Bass Persuades’, aherutse gushyira hanze muri Nzeri 2026.
Miley na Maxx bambikanye impeta z’urukundo mu mwaka ushize. Miley yabigaragarije mu ifoto yashyize hanze agaragaza ko impeta yayambitswe atunguwe.
Si ubwambere Miley agiye gushyingirwa. Mu 2018, yashyingiranywe n’umukinnyi wa filime witwa Liam Hemsworth. Batandukanye mu gihe kitageze no ku mwaka.

Uganda itegerejwemo iserukiramuco Nyafurika rya filime za AI
Umujyi wa Kampala muri Uganda ugiye kwakira iserukiramuco Nyafurika rya filime zakozwe n’ikoranabuhanga ry’ubwenge buhangano, AI.
Ni iserukiramuco ryihariye ryiswe ‘African AI Film Festival’, rizerekanirwamo filime zakozwe na AI hakongerwamo n’inkuru zigaruka ku mibereho y’Abanyafurika. Ritegerejwe ku wa 12 Ukuboza 2026.
Rizabera mu gace ka Kololo, i Kampala. Kwinjira ni ubuntu, icyakora bisaba kwiyandikisha. Hazerekanwa filime 47 zatoranyijwe muri 523 zahatanye ziturutse mu bihugu 45 bitandukanye.
Iri serukiramuco rizatangirizwa i Hollywood, mu Mujyi wa Los Angeles, muri Leta Zunze Ubumwe za Amerika, ku wa 21 Ugushyingo, ahazanahemberwa abazatsinda mu byiciro icyenda bya filime.
Hahatanye filime zo mu bihugu nka Uganda, Nigeria, Misiri, Kenya, Afurika y’Epfo, Zimbabwe, Leta Zunze Ubumwe za Amerika, u Bwongereza, u Bufaransa, n’ibindi.
Lance Broadway yitabye Imana
Umukinnyi wa filime w’Umunyamerika Lance Broadway, wamamaye muri filime za Marvel, yapfuye ku myaka 43 y’amavuko.
Umurambo we wasanzwe muri escalier z’inyubako iherereye mu Mujyi wa Dallas, muri Leta ya Texas, muri Leta Zunze Ubumwe za Amerika. Hari ku wa Kabiri tariki ya 17 Ugushyingo 2026 nk’uko Page Six ibivuga.
Icyo yazize ntikiramenyekana nk’uko raporo y’umuganga w’Akarere ka Dallas ibigaragaza.
Broadway yatangiye kwamamara cyane mu 2013, ubwo hasohokaga filime yitwa ‘Olympus Has Fallen’, yakinnyemo ari umutasi witwa O’Neil, ikigarurira imitima ya benshi muri sinema. Yayikinanyemo na Gerard Butler, Morgan Freeman, Angela Bassett na Aaron Eckhart.






Ibitekerezo 0