{Ikibatsi Live Concert ni igitaramo cyateguwe n’urubyiruko rwo mu itorero rya Nazarene rwitwa NAYOUMI (Nazarene Youth Ministries). Uru rubyiruko rukaba rusengera muri Gisenyi Bridge Church of the Nazarene International.}

Iki gitaramo kizaba ku kuwa Gatanu no kuwa Gatandatu tariki ya 16 na 17 Gicurasi 2014 guhera saa cyenda z’amanwa nk’uko byatangajwe na Ukwiye King Desire ukuriye uru rubyiruko.

Ubusanzwe uru rubyiruko rutegura ibitaramo rugatumiramo abahanzi batandukanye harimo abaririmbyi n'abanyamuziki babigize umwuga mu rwego rwo gushishikariza urubyiruko gukorera Imana bazana abantu kuri Kristu, ibi bikaba bakoresheje impano zabo ndetse no kubashishikariza kumenya kubyaza umusaruro impano zabo bahesha Uwiteka icyubahiro. Ni muri urwo rwego NAYOUMI yateguriye Abanyarubavu igitaramo cyiswe “Ikibatsi Live Concert”.

Muri iki gitaramo nk’uko Desire yabidutangarije batumiyemo abahanzi barimo Liliane Kabaganza, Uncle Sam, King Desire Itsinda Trusters, Blessed Generation, Micky hamwe na Live Works, itsinda rigizwe n’abahanzi bazaba bavuye muri Amerika n’abandi.

Mu gitaramo Ikibatsi Live Concert, uyu mwaka ni ku nshuro ya Gatatu kizaba kibaye dore ko kiba rimwe mu mwaka aho kwinjira aba ari ubuntu.