Umuhanzi Ngaboyisonga Emile agiye gutangiza imurikabikorwa ry’ubugeni ryiswe ‘Rwanda: The Land of a Thousand Hills, Home to a Thousand Stories’, rigamije kugaragaza umuco n’umurage by’u Rwanda mu buryo bugezweho, igikorwa kizamara ukwezi kibera mu Budage.

Rizaba kuva ku wa kuwa 2-30 Kanama 2026 mu nzu ndangamuco yitwa ‘Museum für Kunst’ iherereye mu Karere ka Rockenhausen mu Budage ku muhanda Speyerstraße 3, 67806 Rockenhausen.

Iri murikabikorwa ry’ubugeni rizaba rifunguye imiryango ku bifuza kurisura kuva ku wa Kabiri tariki 2 kugeza ku Cyumweru tariki 30 Kanama guhera Saa Munani n’Igice kugeza Saa Kumi n’Imwe n’Igice.

Rizafasha abazaryitabira kumenya ubwiza bw’u Rwanda biciye mu bugeni ndangamuco, amateka n’ubuzima bw’Abanyarwanda, mu bihe bitandukanye, binyuze mu bihangano by’umuhanzi w’Umunyarwanda Émile Ngaboyisonga.

Iri murika ryihariye rizaba ryerekwa abazarisura imbaraga zo kuvuga amateka biciye mu mashusho nyakuri y’amwe mu mateka Umuhanzi Ngaboyisonga yabahitiyemo mu bihangano bye byubakiye ku murage w’igihugu, imigenzo n’imiterere nyaburanga y’u Rwanda.

Mu kiganiro na IGIHE, Ngaboyisonga yavuze ko iri murikabikorwa rigamije guteza imbere ibiganiro n’ubwumvikane hagati y’imico itandukanye, ryerekana bumwe mu buryo bw’imibereho yabatuye u Rwanda binyuze mu bugeni.

Ati “Muri iki gikorwa ndifuza kumenyekanisha u Rwanda nyakuri ku baturage b’u Budage, igihugu gifite amateka akomeye, umuco ukungahaye, ahantu nyaburanga heza n’indangagaciro zituranga nk’Abanyarwanda.”

Anashimangira ko ubugeni ari uburyo bukomeye bwo kubungabunga amateka, kuyasangiza abandi, gusangira ubumenyi no guhuza abantu bakomoka mu mico itandukanye.

Igikorwa cyo gufungura ku mugaragaro iri murikabikorwa ry’ubugeni kizatangira ku wa 2 Kanama 2026, kuva Saa Tanu kugeza Saa Saba n’igice.

Kizagirwamo uruhare kandi n’indirimbo n’imbyino z’abahanzi barimo Uwamahirwe Josée n’a Evelyne Uwase
bafatanyije n’itsinda baririmbana, mu rwego rwo guhuza ubuhanzi bw’amashusho na muzika mu gusangiza Abadage n’abandi ibyiza bigize umuco nyarwanda.

Iki gikorwa cyateguwe ku bufatanye bwa Luise Busch na Kahnweiler Arbeitskreis – Kultur Extra, giterwa inkunga n’Umuyobozi w’Umujyi wa Rockenhausen, Michael Vettermann.

Ngaboyisonga yavuze ko iri murikabikorwa ry’ubugeni rigamije kandi kuba ikiraro gihuza imico itandukanye, ryibutsa ko ubugeni bukomeje kuba ururimi rwumvwa na bose, rushobora guhuza abantu, guteza imbere ibiganiro no gukomeza ubucuti hagati y’ibihugu.

Ngaboyisenga n’abo bafatanyije batumiye abantu bose bakunda ubugeni, n’umuco nyarwanda, Abanyarwanda batuye mu Budage no hirya no hino mu Burayi, kuryitabira, gusabana bya kinyarwanda, hishimirwa iterambere ry’umuco, umurage n’indangagaciro by’u Rwanda.

Umuhanzi Ngaboyisonga Emile agiye gutangiza imurikabikorwa ry’ubugeni ryiswe ryiswe ‘Rwanda: The Land of a Thousand Hills, Home to a Thousand Stories’, mu Budage

Imurikabikorwa ry'ubugeni rizagirwamo uruhare kandi n’indirimbo n’imbyino z'umuhanzi Josée Uwamahirwe

Imurikabikorwa ry'ubugeni rizagirwamo uruhare kandi n’indirimbo n’imbyino z'umuhanzi Evelyne Uwase

Bimwe mu bihangano Umuhanzi Ngaboyisonga Emile azamurika

Ahazabera igikorwa hamaze gutunganywa

[email protected]