IGIHE

Urubyiruko rw’u Rwanda ruba mu Bwongereza rwaganirijwe ku buryo bwo gukomera ku muco gakondo

0 24-10-2019 - saa 11:14, Karirima A. Ngarambe

Kuwa Gatandatu tariki 19 Ukwakira, mu mujyi wa Londres mu Bwongereza habaye igiterane cyahuje urubyiruko rw’abanyarwanda rusaga 150 ruturutse mu turere twose tugize u Bwongereza.

Icyo igiterane cyabaye kubw’ubufatanye bwa diaspora Nyarwanda yo mu Bwongereza (NARC) na University of Winchester Ishami ryigisha ibijyanye n’umubano w’umuntu n’ibidukikije (Human Geography) rihagarariwe na Dr Jen Dickinson.

John Binama uyoboye umuryango w’ abanyarwanda baba mu Bwongereza yabwiye urwo rubyiruko ko kuri we nta kintu cyiza nko kumva ko ari umunyarwanda.

Yabasobanuriye indangagaciro ziranga umunyarwanda kandi abibutsa ko nubwo abenshi muri bo bavukiye mu mahanga, aho bari hose u Rwanda barugendana.

Reverend Pastor Dr Malachie Munyaneza afatanyije na Dr Olu Taiwo umwarimu muri Winchester university, baganirije urubyiruko ku ngorane n’imbogamizi ruhura nazo zituruka ku igongana ry’imico itandukanye harimo umuco nyarwanda ababyeyi bifuza ko abana babo bakurikiza, ndetse n’umuco wo mu mahanga bahura nawo mu buzima bwabo bwa buri munsi.

Bibukije urubyiruko ko buri wese agira aho avuka bikamufasha kugira intego ku buzima bwe.

Urubyiruko rwahawe umwanya uhagije wo kuganira mu matsinda kuri ibyo bibazo byose ndetse bavuga n’ibyifuzo by’ibyakorwa kugira ngo rudakomeza kwisanga mu ngorane nk’izo rukunze guhura nazo kuko byagaragaye ko bamwe muri bo bahitamo gutoroka imiryango rimwe na rimwe bakisanga baguye mu duco tw’amabandi n’abagizi ba nabi akenshi barangwa no kunywa no gucuruza ibiyobyabwenge.

Rumwe mu rubyiruko rwasabye ko hategurwa amahugurwa ku babyeyi bakigishwa uko bafasha urubyiruko kubaho mu mico itandukanye kandi ko byagabanya ukutumvikana kwa hato na hato hagati y’ ababyeyi n’abana kuko akenshi ari byo bibaviramo indwara zo mu mutwe.

Muri icyo igiterane kandi harimo intumwa ya ambasade yu Rwanda mu Bwongereza akaba n’umujyanama wayo, Fidelis Milonko.

Mu ijambo yagejeje ku rubyiruko, yabasobanuriye gahunda u Rwanda rubafitiye ndetse n’umusaruro rubategerejeho,abasaba kwiga bashyizeho umwete bakirinda icyabaganisha mu ngeso mbi zose.

Kalisa Karemera, umwe mu basaza b’inararibonye batuye mu gihugu cy’u Bwongereza, yasobanuriye urubyiruko amateka yu Rwanda ababwira ku bwitange bwabaye kugira ngo u Rwanda rube ibihugu gikunzwe mu mahanga yose.

Ku byerekeranye n’imibereho rusange, Francine Mukamana umunyarwandakazi ukorera ikigo gikomeye cya Microsoft yabagiriye inama yo kutitinya bagafunguka bagahatana ku isoko ry’umurimo yaba mu Rwanda cyangwa aho ariho hose ku isi.

Uhagarariye urubyiruko muri Diaspora nyarwanda, Noel Ntakirutimanna yasobanuriye ko hari gahunda zabashyiriweho mu rwego rwo guhatanira imirimo mu Rwanda ndetse no guhabwa amahugurwa yabafasha mu kwitegura kugana isoko ry’umurimo.

Yarangije asaba urubyiruko kubana neza n’ababyeyi babo ndetse no gukoresha uburyo bwose bushobotse ababyeyi bakamenya amakuru yabo ya buri munsi ,ibi bikazashobokera mu buryo bwinshi bwo kuganira ndetse akanya niyo kabura hakaba hakoreshwa ikoranabuhanga.

Igitaramo cyasojwe no kwidagadura bifashijwemo na Anaïs Mutumba umuririmbyi akaba n’umunyamakuru

Uhereye ibumoso ni Dr Olu Taiwo na Rev Dr Malachi Munyaneza ubwo batangaga ikiganiro kivuga ku kugumana umuco gakondo imbere y’imico itandukanye
Umwe mu rubyiruko rwitabiriye inama atanga ibitekerezo
Bamwe mu bari bahagarariye Kaminuza ya Winchester: Uhereye ibumoso hari Dr Rachel Locke ; Dr Wayne Veck na Dr Olu Taiwo
Urubyiruko ruri mu mukoro nyuma yo gusosobanurirwa ibijyanye n’uruhurirane rw’imico itandukanye n’umuco gakondo
Igiterane Rwandan Diaspora Networking Youth Conference cyabereye kuri Ambassador Bloomsbury Hotel
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza