The Sentry ivuga ko ADF yagiye ihindura uburyo yinjiza amafaranga nyuma y’igitutu cya gisirikare n’ibihano. Raporo igaragaza ko mu 2025, uyu mutwe wari uwa kabiri mu mitwe yitwaje intwaro yishe abasivili benshi ku Isi.

Ubu bushakashatsi bugaragaza ko zahabu yinjizwa muri Uganda ari yo soko ikomeye ry’amafaranga ADF ikoresha, igakurikirwa n’inyungu ziva kuri cacao, gusoresha ku gahato no gushimuta. The Sentry ivuga ko aya mafaranga agera kuri miliyoni nyinshi z’amadolari.

Raporo igaragaza ko mu gace ka Manguredjipa gusa, ADF ishobora gukura hagati ya miliyoni 1$ na miliyoni 1,6$  (miliyari 1,4-miliyari 2,3 Frw) ku mwaka mu birombe bya zahabu igenzura, kandi ikaba ifite n’utundi duce dukungahaye kuri zahabu. 

The Sentry ivuga kandi ko uyu mutwe ugizwe n’abarwanyi bari hagati ya 600 na 700 ukomeje gushimuta abantu ukabagira abarwanyi n’abakozi bawo ndetse ko hari abana bari munsi y’imyaka 10 yafashe, ibahindura abarwanyi.

John Prendergast uri mu bashinze The Sentry yavuze ko ibikorwa bya gisirikare Uganda ikorana na RDC bitasenye ADF ahubwo ko byatumye yimukira mu duce dukungahaye kuri zahabu na cacao. 

The Sentry yasabye Leta ya RDC guha ADF uburemere bungana n’ubwo iha indi mitwe yitwaje intwaro ikorera mu burasirazuba bw’igihugu nka FRN yahoze yitwa AFC/M23, ikayirwanya ishishikaye.