Iri huriro rivuga ko ibikorwa byo gutegura amatora bikomeje gutinda, bigabanya amahirwe yo gukosora ibitaragenze neza.

SYMOCEL ishimangira ko hakiri uburyo bwo kubahiriza igihe cy’amatora, ariko ko bisaba ibyemezo byihutirwa. Impaka ku Itegeko Nshinga, umushinga wa referendumu n’ibiganiro by’igihugu na byo bikomeje kongera urujijo ku cyerekezo cya politiki.

Gahunda ya Komisiyo yigenga y’Amatora, CENI, yasohotse ku wa 4 Mata 2025, iteganya ko amatora ya Perezida, ay’abadepite ku rwego rw’igihugu n’ay’abadepite b’intara azaba mu Ukuboza 2028. Iyo nyandiko igaragaza ukwezi, ariko ntisobanura umunsi nyirizina wo gutora.

Kwakira no gusuzuma kandidatire z’abifuza kuyobora igihugu biteganyijwe hagati y’Ukwakira n’Ugushyingo 2028. Gutangaza ibyavuye mu matora ya Perezida, gukemura impaka no kurahira k’uzatorwa biteganyijwe muri Mutarama 2029.

Aya matora azakurikira ayo ku wa 20 Ukuboza 2023.

SYMOCEL isaba ko CENI ihabwa amafaranga, ibikorwa byakererewe bigasubukurwa, gahunda y’amatora ikavugururwa kandi hagashyirwaho uburyo butuma abaturage bo mu duce twibasiwe n’intambara bitabira amatora.

Guverinoma yateganyije miliyari 700 z’amafaranga ya Congo mu mushinga w’ingengo y’imari ya 2027 yo gutegura amatora. Icyakora, iri huriro rigaragaza ko igikenewe ari uko amafaranga atangwa koko, ingamba zikagaragarira mu bikorwa.