Mu gitondo cya tariki ya 23 Ukwakira 2026, uyu munyapolitiki uri mu bafite izina rikomeye muri RDC yafatiwe iwe i Kinshasa, mu gikorwa bivugwa ko cyarimo abasirikare barenga 30. Yarekuwe mu masaha y’ijoro nyuma yo kubazwa.

Mu gihe yari afunzwe, urugo rwe ruri muri Komini Ngaliema rwasatswe n’abakozi barimo ab’urwego rwa RDC rushinzwe umutekano w’ikoranabuhanga (CNC) bagera kuri 20.

Inzego za RDC ntizigeze zitangaza ku mugaragaro impamvu nyakuri y’ifatwa n’isakwa rye.

Icyakora, amakuru amaze iminsi atangazwa agaruka cyane kuri pasiporo y’abadipolomate yahawe Thambwe.

Bivugwa ko uwari umukozi we, ubu ukorera muri Minisiteri y’Ububanyi n’Amahanga, yafashwe nyuma yo kumufasha kubona iyi pasiporo. 

Abunganira Thambwe bavuga ko yari yarandikiye Minisitiri w’Ububanyi n’Amahanga, Thérèse Kayikwamba Wagner, asaba ko pasiporo ye y’abadipolomate ivugururwa ashingiye ku kuba yarigeze kuyobora Sena.

Hari kandi amakuru yakwirakwijwe avuga ko yaba yarahuye cyangwa yaragerageje guhura n’abantu bafitanye isano n’umutwa wa FRN uyobowe na Joseph Kabila, ubwo yari mu Mujyi wa Kindu mu Ntara ya Maniema.

Amakuru yatangajwe kuri uyu wa 24 Ukwakira avuga ko ubwo Thambwe yarekurwaga, yasabwe kwitaba CNC, aho bivugwa ko abazwa ku bijyanye na pasiporo yahawe na Minisiteri y’Ububanyi n’Amahanga.

Thambwe w’imyaka irenga 80 yabaye Minisitiri w'Ububanyi n'Amahanga, Minisitiri w'Umurimo, Minisitiri w'Igenamigambi ndetse anayobora Sena kuva mu 2019 kugeza mu 2021. Yamaze igihe ari umwe mu banyapolitiki bakomeye ku butegetsi bwa Joseph Kabila.