Tariki ya 27 Mata 2022 ni bwo Micomyiza uzwi nka Mico, yoherejwe mu Rwanda na Suède kugira ngo akurikiranwe n’ubutabera bw’u Rwanda ku byaha bya Jenoside akekwaho.

Micomyiza yavukiye i Cyarwa mu Karere ka Huye. Mu gihe cya Jenoside, yari atuye mu Murenge wa Tumba akaba yari umunyeshuri mu mwaka wa kabiri mu yahoze ari Kaminuza Nkuru y’u Rwanda, mu ishami rya siyansi.

Ubushinjacyaha buvuga ko yari muri ‘Comité de crise’, itsinda ryari rifite inshingano zo gushakisha no kumenyekanisha Abatutsi bagombaga kwicwa, bikaba ari muri urwo rwego bikekwa ko yagize uruhare muri Jenoside nubwo we aburana abihakana.

Mu 2020 ni bwo Ubushinjacyaha bukuru bw’u Rwanda bwagaragarije Suède uruhare rwa Micomyiza muri Jenoside, busaba ko yoherezwa akagezwa imbere y’ubutabera.

Mu rubanza rwabaye ku wa 20 Ukwakira 2026, IBUKA yafashe ijambo ivuga ko yatanze ikirego nk'umuryango uharanira inyungu z'abarokotse Jenoside yakorewe Abatutsi mu 1994 usaba indishyi.

Umunyamategeko wa IBUKA yagize ati "Twe nk'umuryango uharanira inyungu z'abarokotse Jenoside yakorewe Abatutsi mu 1994, twisunze ikirego cy'Ubushinjacyaha dusaba indishyi Micomyiza Jean Paul.”

IBUKA yasabye ko Micomyiza yatanga izi ndishyi kugira ngo ifashe abarokotse Jenoside, agatanga miliyoni 10 Frw y'igihembo cya Avoka ndetse na miliyoni 5 Frw z’ikurikiranarubanza.

Abanyamategeko bunganira Micomyiza bavuze ko banenze ikirego cya IBUKA yatanze mu izina ry'umuyobozi wayo kuko abagizweho ingaruka n’ibyo umukiliya wabo aregwa nk’uko Ubushinjacyaha bubivuga, atari bo batanze ikirego.

Umunyamategeko wunganira Micomyiza ati "Umuyobozi wa IBUKA nta burenganzira yari afite bwo gutanga ikirego mu izina rye kuko kandi izo ndishyi si zo Micomyiza yohererejwe ava muri Suède.”

Umunyamategeko wa Micomyiza yavuze ko ikirego cya IBUKA nta shingiro gikwiye guhabwa, ahubwo IBUKA ikwiye gutanga indishyi za miliyoni 700 Frw ndetse no gutanga ihazabu ya miliyoni 50 Frw y'igihembo cya Avoka kubera ko Umuyobozi wayo ari we wasabye indishyi.

Ubushinjacyaha bwavuze ko bwareze Micomyiza ibyaha yari akurikiranweho kandi yabanje no kuburanira muri Suède, naho ko iby'indishyi ari ibya IBUKA.

Urukiko rwavuze ko byose bizasuzumwa mu gufata icyemezo.

Urubanza ruzakomeza mu Ugushyingo 2026, ubwo Ubushinjacyaha buzaba busabira Micomyiza ibihano.