Imibare y’ubucuruzi bw’ibikomoka ku buhinzi n’ubworozi muri icyo cyumweru igaragaza ko hoherejwe toni 10.002, zinjiza amadolari 11.702.259.

Ikawa yinjije amadolari 5.212.152 avuye muri toni 780 zoherejwe mu mahanga. Aya mafaranga angana na hafi 44,5% by’ayinjiye yose muri icyo cyumweru.

Icyayi cyo cyinjije amadolari 1.365.365 avuye muri toni 479. Ikawa n’icyayi byombi byinjije amadolari 6.577.517, ni ukuvuga hafi 56,2% by’amafaranga yose yavuye muri ibyo bicuruzwa.

Icyiciro cy’ibindi bicuruzwa bitandukanye cyinjije amadolari 3.660.369 avuye muri toni 7.675. Byoherejwe ku masoko arimo Bangladesh, Leta Zunze Ubumwe z’Abarabu, Amerika n’ibihugu byo muri Afurika.

Ibikomoka ku matungo byinjije amadolari 525.673, avuye muri toni 265 zoherejwe mu Bufaransa no mu bihugu byo muri Afurika.

Mu bicuruzwa by’ubuhinzi bw’imboga, imbuto n’indabo, imbuto ni zo zinjije menshi. Zinjije amadolari 453.358 avuye muri toni 470. Zoherejwe muri Leta Zunze Ubumwe z’Abarabu, Amerika, u Bwongereza, u Budage n’ibihugu byo muri Afurika.

Imboga zinjije amadolari 430.449 avuye muri toni 323. Amasoko zoherejweho arimo u Bwongereza, u Bufaransa, u Bushinwa, u Buholandi, Leta Zunze Ubumwe z’Abarabu n’ibihugu byo muri Afurika.

Indabo zo zinjije amadolari 54.893 avuye muri toni 10 zoherejwe mu Buholandi, mu Bwongereza no mu bihugu byo muri Afurika.

Muri rusange, imboga, imbuto n’indabo byinjije amadolari 938.700, avuye muri toni 803 zoherejwe ku masoko yo hanze y’igihugu muri icyo cyumweru.