Abakuru b’ibihugu na za Guverinoma bigize Umuryango Mpuzamahanga w’Ibihugu Bikoresha Igifaransa (OIF) bafashe icyemezo cyo kongerera Louise Mushikiwabo umwaka umwe ku buyobozi bw’uyu muryango, nyuma yo kunanirwa kumvikana ku buryo bwo gutora Umunyamabanga Mukuru mushya.
Iki cyemezo cyafashwe kuri uyu wa Mbere, tariki ya 16 Ugushyingo 2026, mu nama ya 20 ya Francophonie yabereye i Phnom Penh muri Cambodge, aho ibihugu 53 bifite ubunyamuryango busesuye byemeje, binyuze mu gutora bazamuye ibiganza, ko Mushikiwabo akomeza kuyobora OIF mu gihe cy’umwaka umwe.
Iki cyemezo kijyana n’uko Mushikiwabo atazongera kwiyamamariza kuyobora uyu muryango, nyuma y’icyo gihe cy’inzibacyuho.
Iyi nama yaranzwe n’ukutumvikana gukomeye hagati y’ibihugu byashyigikiraga ko habaho amatora n’ibyifuzaga ko Umunyamabanga Mukuru atoranywa binyuze mu bwumvikane.
U Rwanda rwari rushyigikiye ko habaho amatora, nk’uko byari byemejwe mu nama ya Francophonie yo mu 2022, mu gihe ibindi bihugu byifuzaga ko hakomeza gukoreshwa uburyo bw’ubwumvikane bwari busanzweho.
Abakandida bane bari bahataniye uyu mwanya ni Louise Mushikiwabo w’u Rwanda, Juliana Amato Lumumba wa Repubulika Iharanira Demokarasi ya Congo, Coumba Ba wa Mauritanie na Dacian Cioloș wa Romania.
Amakuru avuga ko nta mukandida washoboraga kwizera kubona nibura kimwe cya kabiri cy’amajwi, ibintu byashoboraga gutuma hatorwa Umunyamabanga Mukuru udafite ubufasha buhagije bw’ibihugu bigize uyu muryango.
Mu gihe haburaga igisubizo, intumwa z’ibihugu zahuriye mu nama yihariye yari igamije gushaka ubwumvikane. Iyi nama yatangiye itinzeho isaha irenga, ariko na yo ntiyabashije gukemura ikibazo.
Byarangiye hafashwe icyemezo cyo kwimurira amatora mu mwaka utaha, Mushikiwabo agahabwa inshingano zo gukomeza kuyobora OIF muri icyo gihe.
Mushikiwabo yanenze igitutu cyashyizwe ku matora
Mu ijambo risoza inama, Mushikiwabo yanenze ibyo yise igitutu n’ukwivanga mu mikorere y’umuryango.
Yavuze ko inama yabereye i Phnom Penh yaranzwe n’amakimbirane atari akwiye kubaho, ashinja kimwe mu bihugu bigize OIF gushaka guhindura ku munota wa nyuma uburyo bw’amatora bwari bwarumvikanyweho n’abanyamuryango bose.
Ayo magambo yari agamije kunenga u Bufaransa, nubwo Mushikiwabo atabuvuze mu izina.
Mu ijoro ryo ku wa 12 rishyira uwa 13 Ugushyingo, Perezida Emmanuel Macron w’u Bufaransa yari yoherereje ubutumwa Perezida Paul Kagame na Félix Tshisekedi, abasaba gukuramo kandidatire za Mushikiwabo na Juliana Lumumba.
Mushikiwabo yavuze ko icyo gikorwa ari ukwivanga mu bibazo bitareba u Bufaransa.
Ku ruhande rw’u Bufaransa, Ibiro bya Perezida Macron byavuze ko iyi nama yagenze neza, kuko habonetse ubwumvikane bwafashije kwirinda ko RDC yafata icyemezo cyo kuva muri OIF.













Ibitekerezo 0