Ousainou Darboe, wabaye umwe mu batavuga rumwe na Jammeh mu mateka, akaba n’umuyobozi w’ishyaka rigamije demokarasi (Parti démocrate unifié-UDP) yarekuranywe na bagenzi be byemejwe n’urukiko rw’Ubujurire rwa Banjul muri Gambia.

Ni umwanzuro wafashwe n’urwo rukiko nyuma y’ugutsindwa kwa Jammeh mu matora ya Perezida wa Repubulika, nk'uko Jeune Afrique yabitangaje.

Ousainou Darboe yafunguwe atanze ingwate itatangajwe. Iyi mpirimbanyi mu kurengera uburenganzira bwa muntu yafunzwe tariki ya 16 Mata 2016 ari kumwe n’abandi bakomeye muri UDP.

Uyu munyamategeko wunganira abandi mu kurengera uburenganzira bwa muntu yafunzwe we na bagenzi be nyuma yo gusaba ko hagaragazwa ukuri ku rupfu n’ifungwa ry’umuyobozi w’ishyaka rya UDP, Solo Sandeng.

Muri Nyakanga 2016 yakatiwe igifungo cy’imyaka itatu.

Ubwo hatangazwaga ko arekuwe by’agateganyo, abamushyigikiye bagaragaje ibyishimo baririmba indirimbo yubahiriza igihugu cya Gambie.

Yahya Jammeh wari umaze imyaka 22 ari Perezida wa Gambia yatsinzwe mu buryo budasanzwe mu matora ya Perezida wa Repubulika, yegukanywe na Adama Barrow wo ku ruhande rw’abatavuga rumwe n’ubutegetsi.

Amajwi yatangajwe bwa nyuma na Komisiyo y’amatora ku wa 2 Ukuboza, yerekanye ko Barrow yatsinze amatora atowe n’abantu 263,515 bangana na 45.5% mu gihe Jammeh yatowe n’abantu 212,099 n’amajwi 36.7%.