Mu mizo ya mbere, icyo gitero kikigabwa mu mpera z'icyumweru, uruhande rwa Gen Maj Niyombare Godeffroid wakoze kudeta igapfuba rwavuze ko ari rwo ruyoboye ibitero ,ko ndetse rwahitanye abasirikare batatu mu ngabo za Leta y'u Burundi.

Nyuma y'iminsi itatu ibyo bitangajwe, Leta y'u Burundi mu ijwi ry'Umuvugizi w'ingabo zagabweho ibitero yagize icyo atangaza nyuma y'ikusanyamakuru n'ipererza ry'ibanze.

Mu kiganiro n'abanyamakuru, Umuvugizi w'Ingabo z'u Burundi, Col Gaspard Baratuza, yatangaje ko ingabo zateye u Burundi zaturutse hanze yabwo, kandi ko abafatiwe ku rugamba basaga 170, mu gihe abahasize ubuzima ari 31.

Col Baratuza yavuze ko ku ruhande rw'ingabo za Leta hakomeretse batandatu hagapfa umwe.

Umuvugizi w'Ingabo z'u Burundi yongeyeho ko abateye bari bitwaje intwaro ziremereye zirimo Mortier 60, Mitrailleuses, AK 47 Klachnikhov, amaradio ya Gisirikare, na moteri nto z'umuriro (generators 4) zagombaga kubafasha kubona umuriro w'ibyombo bavuganiraho ku rugamba.

Ubwo ibitero byagabwaga, imirwano ikomeye yabereye mu makomini ya Kabarore na Bukinanyana.