Itsinda ry’abayobozi b’iyi sosiyete, barangajwe imbere n’Umuyobozi Mukuru wayo, Torbjörn Lööf, ryakiriwe na Minsitiri w’Intebe, Dr Edouard Ngirente kuri uyu wa Mbere, rinabonana n’Umuyobozi Mukuru w’Ikigo cy’Igihugu cy’Iterambere (RDB), Clare Akamanzi.

Abinyujije kuri Twitter, Minsitiri w’Intebe yagaragaje ko iyi sosiyete yagaragaje ubushake bwo kuzashora imari mu bikorerwa imbere mu gihugu.

Yagize ati “Uyu munsi nahuye n’itsinda rya Inter IKEA Group riri kumwe na Ambasaderi wa Suède mu Rwanda. Twaganiriye amahirwe y’ishoramari ari mu Rwanda. IKEA ifitiye inyota gushora imari mu bikorerwa mu Rwanda (icyayi, ibikoresho byo mu rugo n’ibindi. Nijeje IKEA ko u Rwanda rwiteguye gukorana nayo.”

Ibiro bya Minsitiri w’Intebe byatangaje ko abayobozi bakuru ba Inter IKEA Group bifuza kuzakorana n’Urugaga rw’Abikorera mu Rwanda.

U Rwanda rushyize imbere mu kureshya abashoramari, Raporo ya Banki y’Isi iheruka yagaragaje ko rwigiye imbere ho imyanya 12 rugera ku wa 29 ku Isi mu koroshya ubucuruzi.

Ikigo IKEA cyashinzwe mu 1943. Impine igize izina ryacyo ituruka ku nyuguti ibanza ry’uwagishinze (Ingvar Kamprad), iry’urwuri rw’ababyeyi be (Elmtaryd) n’iry’aho bari batuye (Agunnaryd).

Iyi sosiyete ikorera ubucuruzi ku migabane yose ku Isi. Nta gihe kiratangazwa ishobora gutangira gukorera mu Rwanda.