Minisitiri w’Intebe wa Ukraine, Serhii Koretskyi, yatangaje ko hagabwe ibitero byinshi kandi byagize ingaruka ku bice bitandukanye by’igihugu.

Raporo ivuga ko ibitero byabaye mu ijoro byibasiye ibikorwa by’ingufu, inyubako z’abaturage, ibikorwaremezo bitandukanye ndetse n’ibigo bikora ibikorwa by’ubucuruzi mu turere tugera kuri 11 twa Ukraine.

Abantu batanu baguye muri ibyo bitero, harimo n’umwana wo muri Kyiv. Abayobozi ba Ukraine batangaje ko ibikorwa byo gusana amashanyarazi byatangiye nyuma y’uko ahantu hamwe na hamwe habaye ikibazo cyo kubura umuriro.

Minisiteri y’Ingabo y’u Burusiya yatangaje ko kimwe mu bikorwa byibasiwe ari uruganda rutanga amashanyarazi rwa Trypilska, ruherereye hafi ya Kyiv. Abayobozi b’urwo ruganda na bo batangaje ko rwangiritse kandi ko bari bagikora isuzuma ry’uburemere bw’ingaruka zatewe n’igitero.

Mu murwa mukuru Kyiv, abaturage babyutse basanga umwotsi wuzuye mu kirere nyuma y’urusaku rw’ibisasu n’ibikorwa by’ubwirinzi by’ibitero byo mu kirere. Abayobozi basabye abaturage bo mu bice bimwe na bimwe gufunga amadirishya kugeza igihe umwuka wanduye ugabanutse.