Valls yabitangarije mu mujyi akomokamo wa Evry muri Essonne, ku wa Mbere tariki ya 5 Ukuboza 2016 ko byanze bikunze aziyamamariza kuyobora u Bufaransa.

Ni urugamba ariko rumusaba kujya mu ishyaka rye agahatanira amatora y’ibanze amwemerera guhatana na Fillon.

Kubigeraho ni uko abanza kwegura ku mwanya wa Minisitiri w’Intebe, ejo yari yatangaje ko yegura uyu munsi, igikorwa yashyizeho akadomo.

Yagize ati “ Maze kubyumvikanaho na François Hollande, mfite izo mbaraga muri njye, ubushake bwo gukorera igihugu cyanjye, nzitangira u Bufaransa bwampaye byose.”

Valls ashyize imbere politiki yo guharanira no guteza imbere ibihuza Abafaransa, ndetse ko amatora y’ibanze mu ishyaka rye ari uburyo buboneye bwo kongera kurema ubumwe hagati y’Abafaransa.

Manuel Valls yavukiye i Barcelone muri Espagne tariki ya 13 Kanama 1962, akaba yari Minisitiri w’Intebe w’u Bufaransa kuva tariki ya 31 Werurwe 2014.

Yakoze imirimo itandukanye nko kuba Minisitiri w’Umutekano, Meya wa Évry hagati ya 2001- 2012 ndetse aba n’Umudepite hagati ya 2002 na 2012. Si ubwa mbere agiye guhatanira inzira yamwemerera kuyobora u Bufaransa, kuko muri 2011 yari yahatanye mu matora y’ibanze mu ishyaka ry’aba-Socialiste agira amajwi 5.6% atamwemerera guhatanira uwo mwanya, ariko agaragaza ko ashyigikiye François Hollande watsinze ayo matora y’ibanze waje no kumugira Minisitiri w’Intebe.

Manuel Valls yahise asimburwa na Minisitiri w'Umutekano Bernard Cazeneuve nk'uko CNN yabitangaje.