Itahiwacu Bruce (Bruce Melodie) na Mugisha Benjamin (The Ben) bakoze igitaramo cy’amateka cyinjije abantu mu 2026 bishimye bijyanye n’uko aba bahanzi babiri batamenyereye guhurira mu bitaramo.

Iki gitaramo “The Nu-Year Groove” cyabaga ku nshuro ya kabiri yikurikiranya, gitegurwa na The Ben mu kwinjiza abakunzi b’umuziki we mu mwaka mushya.

Kuri iyi nshuro, ni igitaramo cyambukiranyije umunsi kuko cyatangiye Saa Tatu n’iminota 21 z’umugoroba wo ku wa 1 Mutarama 2026 mu gihe cyarangiye Saa Munani n’iminota 15 zo ku wa 2 Mutarama 2026.

Cyari kigabanyijemo ibyiciro bibiri birimo icya mbere cyaririmbyemo abahanzi biganjemo abakizamuka n’abagezweho mu muziki wa none, n’ikindi cy’abahanzi babiri b’umunsi ari bo The Ben na Bruce Melodie.

Imbere y’abafana buzuye BK Arena, Bruce Melodie yamaze ku rubyiniro isaha n’iminota 20 kuva Saa 23:05, aririmba indirimbo zitandukanye zanyuze abari muri iyi nzu yakira abantu ibihumbi 10 bicaye neza.

The Ben yageze ku rubyiniro Saa Sita n’iminota 50, aririmba indirimbo zitandukanye, akanyuzamo agashimira abantu batandukanye aho mu bo yagarutseho harimo Bruce Melodie yari yatumiye.

Abafana basaga n’abananiwe aho hari abageze kuri BK Arena Saa Kumi z’amanywa, ntibategereje ko The Ben asoza kuririmba Saa Munani n’iminota 15 z’igicuku kuko bamwe batashye mbere yaho, ndetse bagaragaza ko batanyuzwe n’uko yabataramiye.

UKO IGITARAMO CYAGENZE:

02:15: The Ben ashimiye abafana be avuga ko igitaramo ‘The Nu-Year Groove’ kirangiye. Asoreje ku ndirimbo ye ‘Thank You’ yo gushima Imana. Ni mu gihe umubare munini w’abari bitabiriye iki gitaramo batashye hakiri kare.

02:05: Hari abamaze gutaha.

Bamwe mu bitabiriye igitaramo batangiye gutaha ndetse kugeza ubu uwavuga ko BK Arena isigayemo abatageze kuri 50% ntiyaba yibeshye.

02:00: The Ben yakiriye Riderman ku rubyiniro mu ndirimbo Inkuba bakoranye mu 2008. Nyuma yaho yakiriye Chorale yitwa Gisubizo ari nako ashimira abafana be bategereje kugeza Saa Munani z’ijoro kugira ngo bataramane.

The Ben yunamiye Buravan na Jay Polly

01:45: The Ben yaririmbye ’I am in Love’ yashyize hanze mu 2012 ubwo yari amaze igihe gito ageze muri Leta Zunze Ubumwe za Amerika. Yakomereje ku zindi ndirimbo yunamira Yvan Buravan mu ndirimbo ye yise Malayika.

Abafana bari muri BK Arena bari bacanye amatoroshi ya telefoni mu gihe ababyinnyi ba The Ben bari bafite ’bougie’ mu kwibuka uyu musore witabye Imana mu 2022.

Nyuma yo kunamira Buravan, yakiriye Green P na P Fla baririmbana Kwicuma mu guha icyubahiro Jay Polly witabye Imana mu 2021. Abana n’umugore w’uyu muhanzi bari ku rubyiniro.

AMAFOTO

Ubwo The Ben yakiraga ku rubyiniro Tom Close na Rema Namakula baririmbanye indirimbo zitandukanye bafitanye.

– Bruce Melodie wabanje ku rubyiniro, aracyari muri BK Arena aho ari kureba uko The Ben ari kuririmba.

01:35: Abitabiriye igitaramo bakomeje kugendana na The Ben mu ndirimbo zitandukanye ari kuririmba.

01:15: Rema Namakula wo muri Uganda yageze ku rubyiniro afatanya na The Ben kuririmba indirimbo bakoranye yitwa This is Love nyuma yayo akomereze kuri Habibi, yaririmbye afatanyije n’abafana be.

Nyuma The Ben yakiriye ku rubyiniro Chriss Eazy baririmbana indirimbo yitwa Folomiana.

01:10: The Ben akomereje ku ndirimbo ze zitandukanye zirimo Fine Girl aho yahamagaye itsinda Inyamibwa ribyina mu mujyo wa Kinyarwanda rimufasha gususurutsa abitabiriye. Nyuma yaririmbye izindi ndirimbo zirimo Sibeza yakoranye na Tom Close wamusanze ku rubyiniro.

Nyuma yayo yagize ati “Iyo aba atari Tom, ntabwo nari kuba mpari”.

01:00: The Ben ashimiye mugenzi we Bruce Melodie uvuye ku rubyiniro avuga ko iki gitaramo ari “intangiriro yo gufata ibi bintu tukabijyana kure cyane, ni dufatana ibiganza turabijyana kure cyane.”

00:55: The Ben yahise akomereza kuri Ndi uw’i Kigali yakoranye na K8 na Meddy ubwo bari bahuriye muri Press One mu myaka 12 ishize. We n’itsinda rye babyinnye mu mpande zose abafana na bo bari mu bicu.

Yakomereje kuri Why yaririmbanye na Diamond nyuma yayo aririmba Plenty Love yitiriye album ye iheruka.

00:50: The Ben yinjiye ku rubyiniro ari kumwe n’itsinda rigari ry’ababyinnyi bambaye imyenda itukura n’umukara mu gihe abamufasha kuririmba bari bazamuye amajwi mu ndirimbo “Indabo zanjye”.

The Ben yahingutse ku rubyiniro yambaye imyenda y’umutuku n’umukara aririmba indirimbo ye nshya yise “Indabo zanjye”.

00:50: Anita Pendo na Lucky Nzeyimana bahamagaye The Ben ku rubyiniro nyuma yo kumuvuga ibigwi. BK Arena yose icyo gihe yakaga amatara ya telefoni z’abafana bamuhaga ikaze.

AMAFOTO

The Ben yitegura kujya ku rubyiniro.

00:30:: DJ Brianne ni we uri gusurutsa abantu muri aka kanya mu ndirimbo zo mu njyana y’amapiano. Afite itsinda ry’abahungu b’ababyinnyi bari kumufasha gususurutsa abantu bakiri mu mwuka w’ikirori.

Ni mbere y’uko The Ben yakirwa ku rubyiniro.

00:27:: Junior Giti umenyerewe mu gusobanura filime, yavuzaga ifirimbi ubwo Bruce Melodie yari ku rubyiniro.

00:25:: Saa Sita n’iminota 25 nibwo Bruce Melodie yavuye ku rubyiniro ahita anashyira hanze indirimbo ye nshya yakoranye na Diamond Platnumz na Brown Joel yitwa Pom Pom.

Amashusho yayo yahise ashyirwa kuri écran zo kuri muri BK Arena, yerekanwa bwa mbere. Video y’iyi ndirimbo yakozwe na Sasha Vybz wo muri Uganda.

00:14: Mu isaha imwe n’iminota 10, Bruce Melodie aracyakomeje kuririmba indirimbo ze zakunzwe mu bihe byashize. Izo zirimo Ntundize yakoze mu myaka ya 2014 ubwo yari mu myaka ye ya mbere mu muziki.

Yakomereje kuri Bado yakoze mu myaka ine ishize. Nyuma yayo yahinduye umujyo ahita aririmba Munyakazi yashyize hanze mu mpera z’umwaka wa 2025, benshi bati ari gucyurira The Ben.

Nyuma y’igitero kimwe yakomereje kuri Saa Moya yavugishije abantu mu bihe bya Guma mu Rugo. Nayo ntiyarangiye yahise aririmba Kungola.

00:10 Umuhanzi Alyn Sano na we yitabiriye iki gitaramo.

00:04: Bruce Melodie yahaye umwanya Sean Brizz aririmba indirimbo ye yakunzwe mu myaka mike ishize yise "Niko kuri".

00:00: Tariki 2 Mutarama 2026, Bruce Melodie yapfukamye aririmba indirimbo y’Imana iri kuri album ye nshya yise Nzaguha umugisha, agezemo hagati araterura ati “Aleluya”.

23:50 Abahanzi Ariel Wayz na Juno Kizigenza bari mu bitabiriye iki gitaramo.

23:50: Ikinyarwanda yakoranye na Riderman mu 2018 ni indi ndirimbo uyu muhanzi yaririmbye. Ni ikimenyetso cy’uko ari umwe mu bo u Rwanda rufite bakomeye kandi bafite ibihangano byinshi.

Nyuma yahise akurikizaho indi yitwa Umuhungu wa Muzika yakoranye na Fireman mu 2014. Yakomereje kuri I am back yakoranye na Jay C mu 2017. Uyu mugabo bakuranye yamusanze ku rubyiniro biyibutsa ibihe bya kera i Kanombe aho bakuriye.

Bruce Melodie yakurikijeho Twarayangije maze mu majwi meza y’abaririmbyi be barahogoza biratinda, abafana nabo bati “Melodie, Melodie’.

23:40: Bruce Melodie yagarutse ku rubyiniro nyuma y’iminota 10 ahera ku ndirimbo yise Funga Macho. Ni indirimbo yakoze mu 2023 nyuma ayisubiramo ari kumwe na Shaggy, inatuma yinjira ku isoko ryo muri Leta Zunze Ubumwe za Amerika n’ahandi.

Nyuma yayo yaririmbye Sawa Sawa yakoranye na Khaligraph Jones wo muri Kenya mu 2021. Kugeza kuri uwo munota, ijambo rye imbere y’abafana ryari imiziki gusa, bwa mbere nibwo yababajije ati “Kigali, hari indirimbo zibura?” maze buri wese avuga iyo yifuza.

Yakomereje ku zindi zirimo Sowe yakoze mu 2024 ashaka kureba uko yapfumurira ku isoko ryo muri Afurika y’Iburengerazuba cyane muri Nigeria.

23:30: Mu minota 30 Bruce Melodie amaze ku rubyiniro nta ndirimbo n’imwe iri kuri album ye nshya araririmba. Yahereye ku zo yaririmbye mu myaka yo ha mbere agitangira umuziki.

Izo zirimo Indorerwamo. Nyuma yayo yahamagaye ku rubyiniro Mighty Popo, umuhanzi akaba n’umucuranzi wa guitar ukomeye mu Rwanda.

Mighty Popo ni Umuyobozi w’Ishuri ry’Umuziki ry’u Rwanda ryahoze ku Nyundo ubu riherereye i Muhanga.

23:20: Nyuma y’Ikinya, Bruce Melodie akurikijeho indirimbo aherutse gukorana na Real yitwa Kuba Nisindiye. Nyuma y’igitero kimwe cyayo, akomeza kuri Igitangaza yakoranye na Juno Kizigenza wamusanze ku rubyiniro.

Hagati aho, itsinda riri gucurangira Bruce Melodie rifite impapuro ziriho amanota y’uburyo umuziki ugomba kuba umeze neza.

Juno Kizigenza akiva kuva ku rubyiniro, Bruce Melodie yakomereje ku Ikinyafu yakoranye na Kenny Sol. Nyuma y’iyo ndirimbo yakomereje kuri Abu Dhabi yashyize hanze mu 2020.

23:08: Bruce Melodie ni umwe mu bahanzi nyarwanda bafite indirimbo nyinshi kandi zakunzwe. Kuva yajya ku rubyiniro nta ndirimbo n’imwe aririmba ngo irangire, ari guhita ayikurikiza indi.

Yaririmbye ‘Uzandabure’ ari kumwe na Symphony Band aho abacuranzi ba ‘Electric guitar’ bari bambaye nk’aba ‘cowboy’ bo muri Mexique cyangwa Espagne.

Ku rundi ruhande, abaririmbyi bamufashije bari bambaye imyenda y’umweru, amakabutura cyangwa amapantalo n’amakote byose by’umweru.

Twongere yakoranye na Queen Cha na yo yayiririmbye afatanyije n’abafana be ijambo ku rindi, akurikizaho Ikinya yakoze mu 2017 iba imwe mu ndirimbo zari zikunzwe muri icyo gihe.

23:05: Bruce Melodie yinjiriye mu ndirimbo Henzapu yakoze mu bihe bya Guma mu Rugo ubwo icyorezo cya Covid-19 cyari cyaribasiye Isi. Yakurikijeho indirimbo ye yise Ndakwanga, abafana bakomeza kujya mu bicu.

23:00: Saa Tanu zuzuye ni bwo umurishyo wa Symphony Band uha ikaze Bruce Melodie wavugijwe. Amatara yose ya BK Arena yari yazimijwe, amagambo yagaragaraga yari “001”, nka code uyu muhanzi asigaye yarihaye.

Buri wese wari muri BK Arena yari ari gufata urwibutso rw’ibi birori by’amateka mu muziki w’u Rwanda. Ni bwo bwa mbere abahanzi bakomeye kandi bahora bahigana ubuhanga bahuriye mu gitaramo nk’iki gikomeye.

Abafana intero yari “Melodie, Melodie”.

AMAFOTO

Ubwo Bruce Melodie yari avuye mu rwambariro.

22:55: Umunya-Nigeria, Adesope Olajide, uzwi cyane mu kumenyekanisha injyana ya Afrobeat hirya no hino ku Isi, ageze ku rubyiniro kugira ngo ahamagare Bruce Melodie.

Adesope azwi cyane mu biganiro bya radiyo na televiziyo bivuga ku muziki wa Afurika. Hagati aho, we na Bianca bakomeje gushyushya abafana mbere y’uko Bruce Melodie agera ku rubyiniro.

22:50: Bianca atangiye abaza abantu izina ry’umuhanzi wa mbere mu Rwanda, abafana ba Bruce Melodie bose basubiza bati “Melodie”.

22:50: Bruce Melodie ni uhawe umwanya ku rubyiniro. BK Arena yose yahagurutse, abantu bacanye amatoroshi mu kumuha ikaze. Intero ni ‘Munyakazi’.

Bianca ahise aza ku rubyiniro abaza abantu niba biteguye ko Bruce Melodie yajya ku rubyiniro. Hagato aho Symphony Band iri kwisuganya kugira ngo ibirori nyir’izina byanzike.

AMAFOTO

Ubwo Gisa cy’Inganzo, Logan Joe na Sherrie Silver Foundation basusurutsaga abari muri BK Arena.

22:35: Mbere y’uko Symphony Band yakirwa ku rubyiniro, DJ RY ni we uri gususurutsa abantu bari muri BK Arena. Ahereye ku ndirimbo zitandukanye za Burna Boy akomereza ku zindi ziri mu njyana ya Kompa.

Mu mwanya utarambiranye “haraza gushya”, Bruce Melodie na The Ben baraza kwisobanura.

22:27: Benno view uherutse gupfukama agasaba The Ben ko yazamuha amahirwe yo kuririmba muri iki gitaramo, yageze ku rubyiniro atwawe mu igare ry’abafite ubumuga. Yari yambaye nk’abantu bo muri Koreya y’Epfo mu mwambaro uzwi nka Hanbok.

Sky2 uzwi ku mvugo igira iti “Wabaga he” yamusanze ku rubyiniro baririmbana indirimbo bakoranye yitwa Turi Wano.

22:10: Abana babarizwa muri Sherrie Silver Foundation ni bo bahawe umwanya kugira ngo basusurutse abitabiriye. Binjiye ku rubyiniro mu ndirimbo za Michael Jackson ndetse n’imyambarire bambaye nka we neza. Abari muri BK Arena babakiranye morale iri hejuru.

22:05: Gisa ni umuhanzi wakunze guhura n’ibizazane agafungwa kubera imyitwarire, gusa yerekanye ko afite impano n’ijwi ryiza mu muziki. Abari muri BK Arena baririmbanye na we indirimbo nyinshi yakoze mu myaka irenga icumi.

Lucky Nzeyimana avuze ko yavuganye na Clement Ishimwe washinze Kina Music ndetse ko uyu muhanzi agiye kuba umwe mu bakoreramo umuziki.

21:55: Gisa cy’Inganzo, umwe mu bahanzi nyarwanda bashimirwa impano yihariye ni we ugeze ku rubyiniro. Ahereye ku ndirimbo ye yise Uruyenzi akomereza ku yo yise Amarira y’uruhinja yakoranye na Amag The Black.

Yaririmbye izindi ndirimbo zirimo Kebuka Ngufotore yakoranye na Diplomat, n’izindi zirimo Ikosora yahuriyemo na Jay Polly.

The Ben yari aherutse kwemeza ko Gisa azahabwa umwanya akaririmba nyuma y’uko abimusabye.

Mu kiganiro n’abanyamakuru gitegura iki gitaramo The Ben yagize ati “Twabonye ubusabe bw’abahanzi batandukanye ntabwo ari abo ngabo. Mboneyeho kuvuga ko ntewe ishema na Gisa.”

21:45: Biragoye kwicara muri aka kanya uri muri BK Arena.

21:40: Logan Joe ageze ku rubyiniro. Uyu musore afite abakunzi benshi muri iki gihe bitewe n’ibihangano bye. Indirimbo ze zirimo nka Treasure zizwi ijambo ku rindi n’urubyiruko rwiganjemo aba GenZ.

Yaririmbye izindi ndirimbo zirimo Kibonumwe zinyura benshi.

AMAFOTO:

Ubwo Yeweeh yajyaga ku rubyiniro mbere y’abandi bahanzi bose, nyuma y’akanya kari gashize DJ Flix asusurutsa abari muri BK Arena.

21:35: Alto yaserutse yambaye isengeri y’umukara, ipantalo ya Pink ndetse n’’inkweto zituruka. Yaririmbye indirimbo ze zirimo Wankomye iri mu zamumenyekanishije cyane. Ni indirimbo yakoranye na Uncle Austin. Ubwo DJ yayishyiragamo, uyu muhanzi yahise avuga ati “Ndashaka Uncle”.

21:31: Ibitaramo bya The Nu-Year Groove bimaze kumenyekana ko biha umwanya abahanzi b’impano kugira ngo bigaragaze. Nyuma ya Diez Dola, Alto na we yahawe umwanya aririmba indirimbo ze zizwi zirimo Molisa n’izindi nyinshi.

Hagati aho, indirimbo ze nyinshi abitabiriye iki gitaramo barazizi ijambo ku rundi ku buryo bari kumufasha kuziririmba.

AMAFOTO:

Ubwo DJ Flix yavangaga imiziki nyuma yo gusimbura DJ Wayv, benshi bari muri BK Arena bari mu bicu.

21:21: Diez Dola, umwe mu bahanzi bato ariko bafite abakunzi benshi, ni we ugeze ku rubyiniro muri aka kanya. Uyu musore yatangiye kumenyekana cyane mu 2024 ubwo yakoraga indirimbo zirimo nka Zangalewa, Ratata n’izindi.

Ni umwe mu basore bazanye umwihariko mu miririmbire ye, mu myambarire no mu biganiro bye n’itangazamakuru.

AMAFOTO

Bruce Melodie, umuhanzi utegerejwe ku rubyiniro mu masaha make ari imbere yamaze kugera muri BK Arena.

Yinjiye muri BK Arena agaragiwe n’itsinda rigari ry’abantu bamufasha mu muziki we.

Uyu mugoroba amaso ni we ahanzwe nyuma y’igihe ashondana na The Ben.

Aherutse gukoza agati mu ntozi asohora indirimbo yitwa Munyakazi, mugenzi we nawe ahita amusubiza abinyujije mu yo yise Indabo zanjye. Uyu mugoroba ni uwo guca impaka

21:10: Niba uri mu rugo, reka tuguhe ubunani. Ubu ushobora gukurikira iki gitaramo nta kiguzi kuri Shene ya Youtube ya IGIHE Kulture. Wibuke gukanda Subscribe kugira ngo ibyiza nk’ibi bitazajya bigucika.

21:01: Umuhanzi wa mbere wakiriwe ku rubyiniro ni Yeweeh. Ni umwe mu bakizamuka muri muzika nyarwanda. Aririmbye zimwe mu ndirimbo ze zizwi zirimo Dangote, Dizaya na Pani.

20:57: Anita Pendo yakiriwe ku rubyiniro.

Umushyushyarugamba Nzeyimana Luckman yakiriye mugenzi we Anita Pendo usanzwe ari Umunyamakuru wa Kiss FM, aho baza gufatanya muri iki gitaramo.

Pendo na we yatangiye ashyushya abafana, abasaba kugaragaza umuhanzi bashyigikiye kuri uyu mugoroba hagati ya The Ben na Bruce Melodie.

20:50: Minisitiri w’Ububanyi n’Amahanga, Olivier Nduhungirehe, ni umwe mu bantu bamaze kugera muri BK Arena. Nduhungirehe ni umwe mu bayobozi bamaze igihe bagaragaza ko bashyigikira abahanzi nyarwanda.

Mu minsi ishize yatangaje ko umwe mu bahanzi nyarwanda yumvise indirimbo ze nyinshi mu 2025 ari Bruce Melodie. Mu bihe bitandukanye yagiye agaragaza ko bidakwiriye guhanganisha The Ben na Bruce Melodie kuko bombi ari abahanzi bakomeye kandi bafatiye runini muzika nyarwanda.

Mu bandi bageze muri BK Arena, harimo Bamporiki Edouard wigeze kuba Umunyamabanga wa Leta muri Minisiteri y’Urubyiruko.

20:45: Hagati aho ikirori cyatangiye gufata irangi!

Abantu batangiye kujya mu bicu mu mpande zose za BK Arena. Nyuma y’injyana zo muri Afurika, ubu DJ Flix akomereje kuri Hip Hop. Indirimbo zirimo John ya Lil Wayne na Rick Ross na Wiggle ya Jason Derulo na Snoop Dogg ziri kwibutsa abantu ibihe byo mu myaka mike ishize.

20:35: Umunyarwenya Fally Merci watangije Gen Z Comedy na Junior Giti wamenyekanye mu gusobanura filimi, bari mu bihumbi by’abakunzi b’umuziki bamaze kugera muri BK Arena ahari kubera igitaramo.

Hagati aho DJ Flix n’itsinda rye bari gushimisha abari muri iki gitaramo mu ndirimbo no mu mbyino. Ubu bageze kuri zimwe zakunzwe zo mu Rwanda nka ‘Kamwe’ yahuriwemo n’abahanzi batandukanye, Bonane (Turawusoza) ya Deejay Pius, Alyn Sano‬ na Bushali‬ na Deux Fois Deux ya Jay Polly.

20:26: DJ Flix ni we ukurikiyeho kugira ngo asusurutse abitabiriye. MC Galaxy ahise ajya ku rubyiniro kugira ngo amufashe gususurutsa abantu maze atangira agira ati “No Nyash No Problem”.

Bari kumwe n’itsinda ry’ababyinnyi bari gususurutsa abitabiriye iki gitaramo. Bahereye ku ndirimbo y’Amapiano ya Kamo Mphela, QUE DJ na Aymos yitwa ‘Parti’ bakomeza n’izindi ziri muri iyi njyana.

20:25: Coach Gael yitabiriye igitaramo

Umushoramari Karomba Gael [Coach Gael], nyiri 1:55AM ifasha abahanzi barimo Bruce Melodie, yageze muri BK Arena aho yitabiriye igitaramo uyu muhanzi ahuriramo na The Ben.

20:20: Lucky Nzeyimana usanzwe ari umunyamakuru kuri RBA ni we ugeze ku rubyiniro nk’umushushyarugamba. Atangiye asaba abafana ba Bruce Melodie n’aba The Ben gukoma akaruru, buri wese akagaragaza uruhande ariho.

Hagati aho niba utari muri BK Arena, ushobora gukurikira igitaramo unyuze hano:
https://igihe.watch.rw/watch/live/62/the-nu-year-groove-feat-the-ben-bruce-melodie-kigali-january-01-2026-watch-live-here

DJ Flix ni we ukurikiyeho kugira ngo asusurutse abitabiriye. Nyuma ye hari abandi ba DJ barimo DJ Brianne.

19:57: DJ Wayv atangiye gususurutsa abafana

Saa 20:00 zibura iminota itatu ni bwo DJ Wayv yatangiye gususurutsa abantu bageze muri BK Arena, acuranga imiziki itandukanye irimo iy’Abanyarwanda n’iyo mu mahanga.

Byasaga n’aho benshi bamaze kurambirwa, ariko abasubije mu mwuka w’igitaramo.

19:55: Abahanzi batandukanye bitabiriye iki gitaramo

Uncle Austin, Nel Ngabo, Platini P na Butera Knowless uri kumwe n’umugabo we Producer Clement bari mu bageze muri BK Arena, ahagiye kubera igitaramo.

19:40: Abageze muri BK Arena bategereje ko igitaramo gitangira.

Kugeza ubu abantu bamaze kugera imbere muri iyi nyubako yakira abantu ibihumbi 10 bicaye neza, bagera muri 70%.

19:15: Abitabiriye biteze kuryoherwa n’igitaramo cy’abahanzi babiri bakomeye mu Rwanda.

19:00: Minisitiri Utumatwishima yageze muri BK Arena

Minisitiri w’Urubyiruko n’Iterambere ry’Ubuhanzi, Dr. Utumatwishima Jean Nepo Abdallah, ari mu bamaze kugera muri BK Arena, ahagiye kubera igitaramo gihuza The Ben na Bruce Melodie.

Ku wa 18 Ugushyingo 2025, Minisitiri Utumatwishima yakiriye The Ben n’itsinda risanzwe rimufasha, ubwo bari mu myiteguro y’iki gitaramo.

18:50: Ihangana ry’abafana ryatangiye muri BK Arena.

Bamwe mu bafana bamaze kugera muri BK Arena batangiye kugaragaza uruhande bahagazeho mu gitaramo kigiye kuba.

Hari abitwaje imyambaro nimero 001 n’iyanditseho Munyakazi, ibigaragaraza ko bashyigikiye Bruce Melodie.

Ni mu gihe kandi hari abafite imipira yanditseho ’Igisamagwe’, bagaragaza ko bashyigikiye The Ben.

18:15 Abitabiriye igitaramo bakomeje kugera kuri BK Arena.

Mu gihe amasaha yo gutangira igitaramo ari kwegereza, abantu batandukanye bakomeje kugera i Remera.

– The Ben na Bruce Melodie mu gitaramo cy’amateka cyabanjirijwe n’ihangana

The Ben na Bruce Melodie bamaze iminsi bacyocyorana bagiye kwipimira muri BK Arena.

Iki gitaramo gifatwa nk’icyamateka mu muziki w’u Rwanda cyane ko atari byinshi byagiye bitegurwa mu rwego rwo kugira ngo abahanzi bagihuriyemo bipime.

Aba bahanzi bombi bafatwa nk’aba mbere mu Rwanda ndetse kubera ubwinshi bw’abafana babo, biragoye kumenya uhiga undi. Gusa uyu mugoroba ushobora gusiga impaka zicitse.

🎥𝐀𝐌𝐀𝐒𝐇𝐔𝐒𝐇𝐎🎥

Ihangana ryeruye hagati ya Bruce Melodie na The Ben ryatijwe umurindi n’abafana. Uko umwaka w’ibi bihangange bihora bihigana ubutwari mu muziki wagenze.

🎙️:@kamabare_1 pic.twitter.com/OQUWUU114h

— IGIHE Kulture (@IGIHEKulture) December 25, 2025

17:30: Uko muri BK Arena imbere hateguye.

17:00: Abitabiriye igitaramo bakomeje kugera kuri BK Arena.

Kuva imiryango ikinguwe Saa Kumi, abantu benshi batangiye kwinjira hasuzumwa amatike yabo, ariko bakaguma hanze y’umuzenguruka wa BK Arena kuko hagisuzumwa amajwi y’ibyuma byifashishwa mu gitaramo.

Amafoto: Munyemana Isaac, Ramzy, Cyubahiro Key & Rusa Prince