Iki gitaramo cyahuje abahanzi bakomeye mu muziki wa Gospel barimo Israel Mbonyi, Ben & Chance, René & Tracy na True Promises Ministries bo mu Rwanda; Joe Mettle wo muri Ghana, Lebo Sekgobela na OnceMore Six bo muri Afurika y’Epfo, Bella Kombo wo muri Tanzania, Grace Charles wo muri Ghana, Emeka Songsz wo muri Nigeria na Evelyn Wanjiru wo muri Kenya.

Uretse kuba cyabaye umwanya wo guhimbaza Imana, iki gitaramo cyabaye amahirwe ku bahanzi bo mu bihugu bitandukanye yo guhurira ku rubyiniro, bagafatanya mu bikorwa by’umuziki.

Bamwe muri bo bakoranye indirimbo zafatiwe amajwi n’amashusho muri iki gitaramo, biteganyijwe ko zizagenda zisohoka mu minsi iri imbere.

Mu ndirimbo zakozwe, Israel Mbonyi yakoranye na OnceMore Six wo muri Afurika y’Epfo, Ben & Chance bakorana na Lebo Sekgobela, mu gihe René & Tracy bakoranye na Joe Mettle. 

Bella Kombo wo muri Tanzania we yakoranye na Evelyn Wanjiru wo muri Kenya, Emeka Songsz wo muri Nigeria akorana na Grace Charles wo muri Ghana.

Uretse aba bahanzi, abandi na bo bafatanyije mu kuramya no guhimbaza Imana, mu gihe Pastor Juliene Kabanda yabwirije ijambo ry’Imana abitabiriye iki gitaramo.

‘Praise Unlimited’ ifitanye isano n’igitekerezo cya Halal Afrika, umushinga watangijwe mu 2016 i Maryland muri Leta Zunze Ubumwe za Amerika n’abavandimwe bo mu muryango wa Onn n’abandi Banyafurika bari bafite intego yo guteza imbere umuziki wa Gospel ukomoka muri Afurika.

Mu 2017, Halal Afrika yakoze igikorwa cya mbere i Baltimore muri Maryland, hasohoka album yiswe My Best Worship. Mu 2019, ibikorwa byakomereje i Victoria muri Afurika y’Epfo, hasohoka umushinga The Moment.

Mu 2022, Halal Afrika yafatiye yakoreye umushinga witwa Through It All i Pretoria muri Afurika y’Epfo, wasohotse muri Nyakanga 2023.