Mu Rwanda, aba bahanzi bakunzwe cyane mu ndirimbo yakanyujijeho yitwa Ndihamba Nawe yakunzwe mu myaka ya 2008 ndetse kugeza ubu iracyakunzwe. By’akarusho, iri tsinda riri guca ibintu muri iki gihe mu ndirimbo nka ‘Khona’ bakoranye na Uhuru, "Tchelete (Goodlife)" bakoranye na Davido n’izindi.

Bari bategerezanyijwe amatsiko menshi n’abari bitabiriye iki gitaramo cyasozaga ibirori ngarukamwaka bya Mützig Beer Fest.

Iki gitaramo cyabereye mu busitani bw’ahitwa Rugende Training Center, ahantu ubusanzwe abasohokera bakunze kujyayo bakurikiranye kwigirayo uko bagendera ku mafarashi.

Abantu bari bakubise buzuye, bafata icyo kurya n’icyo kunywa cyiganjemo Mützig byose bigaherekezwa n’umuziki w’inyuramatwi.

Abahanzi bagize Mafikizolo bakigera ku rubyiniro, abantu baberetse ko babishimiye cyane, batera hejuru babakiriza amashyi menshi baririmbana na bo ubona bose batwawe.

Bari babategereje igihe kinini, kuko igitaramo cyatangiye mu ma saa kumi z’umugoroba abafana bakomeza guteguzwa ko hari itsinda rya Mafikizolo riri bubaririmbire.

Ubusanzwe itsinda rya Mafikizolo rizwiho umwihariko wo kugira indirimbo zifite umudiho wa Kinyafurika gusa hari n’indirimbo zabo zacuranzwemo umurya wa gitari uryohera ugutwi.

Gusa bananyuzagamo bakabyina zimwe mu ndirimbo zabo zibyinitse nka "Tchelete (Goodlife)".

Mafikizolo niyo yasoje iki gitaramo, mbere yabo hacuranze abandi bahanzi nab o bafite ubuhanga barimo Albert Rudatsimburwa wakirigise gitari benshi barishima, Lion Imanzi, Mike Kayihura n’abandi.

Mafikizolo baje kuririmba mu Rwanda baturutse muri Afurika y’Epfo,bavuze ko bari bafite inyota yo gutaramira i Kigali ndetse bashimye iterambere u Rwanda rumaze kugeraho.