Iri tangazo ryatanzwe nyuma y’uko komisiyo yigenga ishinzwe gukemura iki kibazo ifashe umwanzuro ko Manchester City yarenze ku mategeko agenga imari y’amakipe ya Premier League.

Umuyobozi Mukuru wa Premier League, Richard Masters, yavuze ko umwanzuro wafashwe werekana ko iyi kipe yamaze igihe kinini itubahiriza amabwiriza y’irushanwa.
Ati “Iki ni icyemezo gikomeye. Biragaragara ko iyi kipe yarenze ku mategeko ya Premier League mu gihe cy’imyaka hafi icumi.”

Gusa yavuze ko hakiri ibindi bice by’iyi dosiye bigomba gukomeza gusuzumwa, harimo n’ikibazo gikomeye cyo kumenya igihano kizakurikiraho kubera aya makosa.

Ibyaha Manchester City yashinjwaga bijyanye n’amakuru y’imari yatanzwe n’iyi kipe, cyane cyane ku bijyanye n’amafaranga yinjizwaga, amafaranga yakoreshejwe ndetse n’amasezerano y’ubucuruzi.

Premier League yatangiye gukurikirana iki kibazo nyuma y’uko hagaragaye impungenge ku kuba iyi kipe yararenze ku mategeko agenga imikoreshereze y’amafaranga mu makipe.

Manchester City yakomeje guhakana ibyo yashinjwaga, ivuga ko yubahirije amategeko yose kandi ko izakomeza kurengera izina ryayo.

Iyi kipe yo mu mujyi wa Manchester yabaye imwe mu makipe akomeye mu Bwongereza no ku rwego mpuzamahanga mu myaka ishize, aho yatwaye ibikombe byinshi bya Premier League ndetse n’ibindi bikombe bikomeye.

Mu gihe komisiyo yigenga yamaze gufata umwanzuro ku byaha by’imari, haracyategerejwe umwanzuro ku bihano bishobora gufatirwa iyi kipe.

Amategeko ya Premier League ateganya ibihano bitandukanye ku makipe agaragayeho amakosa mu mikoreshereze y’imari, birimo gucibwa amafaranga, gukurwaho amanota, cyangwa kumanurwa mu cyiciro cya kabiri.