Kuri uyu wa Gatatu, tariki ya 7 Ukwakira 2026, ni bwo FIFA yashyize hanze urutonde ntakuka rw’uko amakipe ahagaze, nyuma y’urwaherukaga muri Nyakanga.

Ikipe y’u Rwanda iherutse kunganya na Kenya 0-0, mu mukino mpuzamahanga wa gicuti wakiniwe kuri Stade Amahoro. Uyu wakurikiye indi yo gushaka itike y’Igikombe cya Afurika cya 2027.

Amavubi yatsinze Cap-Vert ibitego 2-1, igira intsinzi enye mu mikino itanu, zayihaye amanota hafi 40 ku rutonde rwa FIFA, ku buryo byatumye yisanga mu myanya iherukaho mu myaka icyenda ishize.

U Rwanda rwakuye amanota 3,79 ku mukino wa Grenada, rukura amanota 5,04 ku mukino wa Estonia, rubona amanota 11,40 ku mukino wa Liberia, ndetse n’amanota 18,15 ku mukino wa Cap-Vert.

Aya manota uko ari 38,38 yatumye u Rwanda rugira amanota 1156,16, aruzamura imyanya icyenda ku rutonde rwa FIFA, aho rwavuye ku mwanya wa 128 rugera ku mwanya wa 119.

Amavubi aheruka ku mwanya uri hejuru y’uwa 120 mu 2017, icyo gihe akaba yarabaye aya 113, ndetse muri uwo mwaka akaba yaranazamutse akagera ku mwanya wa 93.

Ubwo iyi kipe yatozwaga na Stephen Constantine hagati ya 2014 na 2015, yavuye ku mwanya 134, agera ku mwanya wa 64, ari na wo mwanya mwiza u Rwanda rwagize ku rutonde rwa FIFA.

Mu rugendo rwo gushaka itike y’Igikombe cya Afurika kizabera muri Uganda, Tanzania na Kenya, u Rwanda ruzakina na Mali mu mikino ibiri iteganyijwe mu Ugushyingo 2026.

Mu makipe yose yo ku Isi u Rwanda ni rwo rwazamutse imyanya myinshi, mu gihe iyamanutse myinshi ari Sierra Leone yatakaje umunani. Ikipe yabuze amanota menshi ni Cap-Vert yabuze 29,39.

Espagne yakomeje kuba iya mbere, Argentine iya kabiri, u Bufaransa bukaba ubwa gatatu, u Bwongereza bukaba ubwa kane, mu gihe Portugal yafashe umwanya wa gatanu iwukuraho Brésil.

Amavubi ayoboye Itsinda K ryo gushaka itike y’Igikombe cya Afurika cya 2027 n’amanota atandatu kuri atandatu, rukayanganya na Mali, naho Liberia na Cap-Vert nta nota zirabona.