Uyu mukino wari utegerejwe cyane wabereye muri BK Arena, mu ijoro ryo ku wa Gatanu, tariki ya 12 Kamena 2026.

Ni umukino watangiye wihuta cyane amakipe yombi atsindana, agace ka mbere karangira Patriots iyoboye n’amanota 31 kuri 29 ya Tigers.

Patriots yakomeje gukina neza mu gace ka kabiri, Garba Kennedy na Kwizera Sage batsinda amanota menshi.

Ikinyuranyo cyazamutse kigera mu manota 10, igice cya mbere kirangira Patriots BBC ikomeje kuyobora umukino n’amanota 62 kuri 52 ya RSSB Tigers.

Tigers yatangiranye imbaraga agace ka gatatu, igabanya ikinyuranyo kigera mu manota ane (71-75).

Icyakora aka gace karangiye Patriots ikomeje kuyobora umukino n’amanota 77 kuri 73 ya Tigers.

Agace ka nyuma kari injyanamuntu karimo n’imibare myinshi, Stubbs utari wagaragaye cyane mu mukino atangira gutsinda amanota menshi.

Umukino warangiye Patriots BBC yatsinze RSSB Tigers amanota 100-85. Garba Kennedy yatsinze amanota 22.

Patriots yakomeje gushimangira umwanya wa mbere n’amanota 25, aho mu mikino 14 imaze gukina yatsinzemo 11, itsindwa itatu.

Ni mu gihe Tigers yo imaze gukina imikino icyenda ifitemo amanota 16 kubera ibirarane yagize ubwo ya muri BAL 2026.

Mu mukino wabanjiriye uyu, APR BBC yatsinze Kepler BBC amanota 113-84 ikomeza kwicuma ku rutonde rwa shampiyona.

Ikipe y’Ingabo iri ku mwanya wa kane n’amanota 19, mu mikino 10 imaze gukina.

Mu bagore, APR WBBC yatsinze Kepler WBBC amanota 67-48, igira amanota 18 ku mwanya wa gatatu.

Iyi shampiyona izakomeza ku Cyumweru ahateganyijwe imikino ikomeye, aho REG BBC izakina na Kepler, UGB na APR BBC, mu gihe RSSB Tigers izakina na Azomco. Imikino yose izabera muri Petit Stade.

Amafoto ya IGIHE: Umwari Sandrine