Iri rushanwa riri no ku ngengabihe ya Shampiyona ya Afurika ryatangiye hakinwa "Super Stage" yabereye mu masangano ya Kimihurura iruhande rwa Kigali Convention Centre.

Mu muhango wo gufungura iri siganwa, Gakwaya Christian, yavuze ko bamaze guhabwa uburenganzira bwo kuzakira n’irya 2023.

Yagize ati “Imitegurire y’irushanwa mu Rwanda imaze kuba myiza ku buryo ababishinzwe badahwema kubitwereka. Ni muri urwo rwego no mu mwaka utaha wa 2023, tuzongera tukakira iri rushanwa.”

Mbere y’uko bahatana, abasiganwa babanje kwimenyereza umuhanda bakiniyemo. Nyuma batangiye kurushanwa bahanganye babiri babiri kugira ngo haboneke uzatangirira ku mwanya w’imbere n’uko bazahaguruka bakurikiranye.

Muri rusange irushanwa ryatangiye neza ndetse nta mpanuka ikomeye yaribereyemo. Ibi bishimangirwa n’Umuyobozi wa Siporo muri Minisiteri ya Siporo, Munyanziza Gervais.

Ati “Iki gikorwa cyishimiwe ku buryo bugaragarira buri wese, ryitabiriwe kandi cyane nta n’umukinnyi n’umwe wagize impanuka idasanzwe.”

Yongeyeho ko hakiri akazi kenshi kugira ngo babashe kuza imbere y’igihugu cya Kenya mu mitegurire, ndetse Minisiteri igiye gushyiramo imbaraga kugira ngo ibone abaterankunga bazayifasha kuko ikibura muri rusange ari amikoro.

Imodoka zose zitabiriye irushanwa uko ari 20 zabashije kurisoza. Nkuko byari byitezwe Patel Karan ukinira Ikipe yo muri Kenya ni we wabashije kuza ku mwanya wa mbere. Leroy Gomes ukinana n’umugore we Urshlla Gomes na bo basoje ku wa kabiri.

Irushanwa rirakomereza mu Karere ka Bugesera, aho abasiganwa bazanyura mu mihanda ya Gako-Gasenyi na Nemba-Ruhuha mu gihe ku Cyumweru bazarushanwa mu mihanda ya Kamabuye-Gako.

Amafoto: Yuhi Augustin