Iri siganwa rizwi “Memorial Gakwaya Claude”, ryabaye kuva ku wa 16 kugeza ku wa 18 Ukwakira 2026.

Kuva ku munsi wa mbere, abafana bari benshi ku mihanda n’ahantu hatandukanye ryanyuraga mu Karere ka Huye n’aka Gisagara, bamwe bahagaze ku nkengero zayo, abandi ku dusozi bareba uko abapilote bahanganaga.

Mu modoka, Giancarlo Davite wari kumwe na Matteo Davite muri Mitsubishi EvoX ni we witwaye neza kurusha abandi, ayobora isiganwa kuva ritangiye kugeza ku musozo.

Davite yarangije uduce 10 twakinwe akoresheje isaha imwe n’iminota 30, aza imbere y’abandi bapilote barimo Umunya-Uganda Ponsiano Lwakataka wabaye uwa kabiri na Gakwaya Eric wabaye uwa gatatu.

Icyatumye Huye Rally y’uyu mwaka irushaho kugira umwihariko ni uko hatagaragayemo imodoka gusa, ahubwo hanabayeho isiganwa rya moto ryakuruye amaso ya benshi mu bari bitabiriye. Ni isiganwa ryegukanywe na Olivier Fietzek akoresheje iminota 32 n’amasegonda 45, ahigika abandi 11 bari bahanganye.

Aho abasiganwa banyuraga, hasigaraga ivumbi, urusaku rwa moteri n’amashyi y’abafana bakurikiraga buri kanya k’isiganwa.

Uretse gutwara Huye Rally 2026, Davite yanashimangiye kwegukana Shampiyona y’u Rwanda yo gusiganwa mu modoka muri uyu mwaka wa 2026.

IGIHE yabakusanyirije amafoto agaragaza bimwe mu bihe by’ingenzi byaranze iri siganwa.

Abafana bari bitabiriye

AMAFOTO: Kwizera Remy Moses