Iri siganwa ngarukamwaka ry’imodoka riri kubera mu turere twa Huye na Gisagara kuva ku wa Gatanu, tariki ya 16 Ukwakira, kugeza ku Cyumweru tariki ya 18 Ukwakira 2026.

Nyuma yo kwiyereka abatuye mu Mujyi wa Huye ku wa Gatanu, ku wa Gatandatu abapilote basiganiwe mu mihanda yo mu Karere ka Gisagara na Huye aho hakinwe uduce dutandatu.

Uduce tubiri twa mbere twakiniwe i Gisagara mu muhanda w’ibilometero 40, dukurikirwa n’utundi tubiri twakiniwe mu muhanda wa Rango ku ntera y’ibilometero 7,6 mu gihe tubiri twasoje umunsi twakiniwe i Kibirizi ku ntera y’ibilometero 7,5.

Giancarlo Davite wari utwaye Mitsubishi Lancer Evo X, yasoje uyu munsi wa mbere w’ibilometero 110,2 ayoboye urutonde rusange nyuma yo gukoresha isaha, iminota icyenda n’amasegonda 14, asiga Umunya-Uganda Ponsiano Lwakataka uri kumwe na Mwambazi Lawrence muri Subaru Impreza iminota 12 n’amasegonda 48.    

Ku mwanya wa gatatu haje Gakwaya Eric na Kayibanda Aurore bakoresheje isaha imwe, iminota 28 n’amasegonda 52, mu gihe Abanya-Uganda Faisal Kayiira na Babu Yusuf basoreje ku mwanya wa kane.    

Gakwaya Claude na Mugabo Claude basoreje ku mwanya wa gatanu, bakurikirwa na Yoto Fabrice na Jojo Mugeni naho Dusingizimana Salvator na Muhire Bosco baba aba karindwi.

Hakizimana Jacques na Kevin Semana basoreje ku mwanya wa munani, Banange Jean Chris na Gahigi M Ariella baba aba cyenda, naho Bryan Murengezi na Delicia Fergadiotis baba aba 10.   

Imodoka 16 ni zo zari zitezwe muri iri siganwa ariko izitabiriye ni 10 gusa.

Ku munsi wa nyuma w’irushanwa, kuri iki Cyumweru tariki ya 18 Ukwakira, isiganwa rirakomereza mu mihanda y’i Save mbere y’uko hamenyekana abitwaye neza muri Huye Rally 2026.

Mu gihe Giancarlo Davite yasoza iri siganwa ari mu myanya umunani ya mbere, arahita yegukana Shampiyona y’u Rwanda ya 2026.

Mbere yo gukina ku wa Gatandatu, abapilote n’abasiganwa kuri moto bitabiriye “Huye Rally 2026” batanze umuganda wo kubaka inzu y’umuturage witwa Uwamariya Pascasie wo mu Murenge wa Tumba, Akagari ka Cyarwa.

Mu byo bamugeneye harimo n’imifuka ya sima izifashishwa n’abaturage bakomeje kubaka iyi nzu binyuze mu muganda.

Ni igikorwa cyatekerejweho nyuma y’uko inzu Uwamariya yari asanzwe abamo yasenywe n’ibiza.

AMAFOTO: Kwizera Remy Moses