Umunsi wa kabiri wa Shampiyona y’u Rwanda y’Umupira w’Amaguru w’Abafite Ubumuga, uzwi nka ‘Amputee Football’, wasize hinjijwe ibitego 61. Musanze iyoboye urutonde mu bagabo, mu gihe Nyarugenge Women iri ku isonga mu bagore.

Iyi mikino yabereye mu Karere ka Musanze mu mpera z’icyumweru, isozwa ku Cyumweru, tariki ya 18 Ukwakira 2026. Yitabiriwe n’amakipe 10 y’abagabo n’ane y’abagore.

Mu bagabo, amakipe yitabiriye ni Musanze, Karongi, Rubavu, UR-Huye, Kicukiro, Nyarugenge, Kayonza, Huye, Nyamasheke na Nyabihu.

Buri kipe imaze gukina imikino itatu. Musanze ni yo yonyine yatsinze imikino yose, bituma iyobora urutonde rwa shampiyona n’amanota icyenda.

Musanze kandi ni yo imaze kwinjiza ibitego byinshi, kuko ifite 13, mu gihe yatsinzwe bitatu gusa. Karongi ni yo yatsinze ibitego byinshi mu mukino umwe, ubwo yanyagiraga Huye ibitego 9-0.

Nyamasheke na Nyabihu nta mukino n’umwe byatsinze kuri uyu munsi wa shampiyona. Nyabihu yo imaze kugira umwenda w’ibitego 15.

Mu bagore, hitabiriye Nyarugenge Women, Nyanza Women, Musanze Women na Muhanga Women.

Nyarugenge Women iyoboye urutonde n’amanota atatu, inganya na Nyanza Women na Musanze Women. Muhanga Women iri ku mwanya wa nyuma nta nota na rimwe ifite.

Muri rusange, mu mikino yo kuri uyu munsi wa kabiri wa shampiyona hinjijwe ibitego 61, birimo 54 mu bagabo na birindwi mu bagore.