Imikino Olempike y’Urubyiruko ya 2026 izabera i Dakar muri Sénégal kuva ku wa 31 Ukwakira kugeza ku wa 13 Ugushyingo 2026. Bizaba ari inshuro ya kane iri rushanwa rikinwa ndetse ni ubwa mbere igikorwa cya Komite Olempike cyo kuri uru rwego kizaba kibereye ku Mugabane wa Afurika.

U Rwanda ruzahagararirwa n’abakinnyi icyenda bazahatana mu mikino itanu irimo gusiganwa ku maguru, koga, gusiganwa ku magare, Taekwondo na Kung-Fu Wushu.

Mu Mikino Ngororamubiri, u Rwanda ruzahagararirwa na Abizera Sonia Eli-Elohe uzasiganwa metero 400 mu bagore. Uyu mukinnyi watwaye umudali w’Umuringa muri metero 800 mu Mikino y’Urubyiruko ya ANOCA Zone V, akomeje imyiteguro ayobowe n’umutoza Kanyabugoyi Anicet.

Abizera yashyizwe mu mwiherero uri kubera i Kigali, aho ari gukorera imyitozo kuri Stade Amahoro. Ni umwiherero uzakomeza kugeza ku wa 26 Ukwakira 2026.

Mu mukino wo koga, abakinnyi bane bazahagararira u Rwanda muri Dakar 2026 bari mu Irushanwa rya 11 rya Africa Aquatics Zone III Swimming Championships, riri kubera i Kampala muri Uganda kuva ku wa 21 kugeza ku wa 25 Ukwakira.

Abo ni Ntwali Jayden, Murenzi Sheja Kean, Mugabo Aragsan Liban na Kalisa Keza, bayobowe n’umutoza Rukundo Patrick. Bose banitabiriye Imikino y’Urubyiruko ya ANOCA Zone V yabereye i Nairobi muri Kenya.

Ntwali Jayden azahatana muri metero 50 mu gukura umusomyo [Freestyle], metero 50 muri ‘Backstroke’ na metero 50 muri ‘Butterfly’, mu gihe Murenzi Sheja Kean azakina metero 100 ‘Butterfly’, metero 100 ‘Freestyle’ na metero 200 ‘Freestyle’.

Mu bakobwa, Mugabo Aragsan Liban azahatana muri metero 50 na metero 100 'Freestyle' ndetse na metero 50 'Backstroke'. Kalisa Keza we azakina metero 200 'Backstroke', metero 50 'Breaststroke' na metero 50 'Butterfly'.

Abakinnyi b’amagare bari muri Shampiyona Nyafurika

Mu mukino w’amagare, Akimana Donatha na Shema Emmanuel na bo bakomeje imyiteguro binyuze mu mwiherero no mu marushanwa mpuzamahanga.

Kuva ku wa 1 kugeza ku wa 17 Ukwakira, aba bakinnyi bari mu mwiherero i Nairobi muri Kenya, wateguwe n’Ishyirahamwe Mpuzamahanga ry’Umukino w’Amagare (UCI) ku bufatanye na Komite Mpuzamahanga Olempike (IOC) n’Impuzamashyirahamwe y’uyu mukino muri Afurika (CAC).

Nyuma y’uwo mwiherero, bitabiriye Shampiyona Nyafurika y’Amagare ya 2026 iri kubera i Kisumu muri Kenya kuva ku wa 21 kugeza ku wa 25 Ukwakira, aho bakomeje kugerageza urwego rwabo mbere yo kwerekeza i Dakar.

Akimana na Shema bayobowe n’umutoza Byukusenge Nathan, mu gihe Maniriho Eric ari umukanishi w’iyi kipe. I Dakar, bombi bazahatana mu gusiganwa n’igihe no mu isiganwa ryo mu muhanda.

AbazakinaKung-Fu Wushu na Taekwondo na bo bari mu myiteguro

Mu mikino njyarugamba, Mugisha François azahagararira u Rwanda muri Kung-Fu Wushu mu cyiciro cya ‘Changquan Combined’ mu bagabo, ari kumwe n’umutoza Kwizera Claudien.

Muri Taekwondo, Uwamahoro Françoise azahatana mu cyiciro cy’abagore batarengeje ibilo 49, ari kumwe n’umutoza Ntawangundi Eugène.

Aba bakinnyi bombi bakomeje imyiteguro binyuze mu mashyirahamwe yabo, ndetse ubu bakaba bari mu mwiherero.

Komite Olempike y’u Rwanda yavuze ko ku bufatanye n’amashyirahamwe y’imikino bireba, ikomeje gukurikirana imyiteguro y’aba bakinnyi icyenda kugira ngo bazajye muri Sénégal biteguye neza guhesha ishema u Rwanda.

Imikino Olempike y’Urubyiruko izitabirwa n’abakinnyi bari munsi y’imyaka 18. Uretse guhatana mu mikino, ibaha n’umwanya wo kwitabira gahunda z’uburezi n’umuco zigamije kubafasha gusobanukirwa no kwimakaza Indangagaciro Olempike.

abiz