Ibinyamakuru binyuranye byo mu Bwongereza byatangaje ko Manchester United yatangiye gutekereza ku buryo yaha akazi Pochettino, mu gihe ubuyobozi bwayo buri kwiga ku hazaza ha Carrick.

Umuyobozi Mukuru wa Manchester United, Omar Berrada n’ushinzwe umupira w’amaguru muri iyi kipe, Jason Wilcox, berekeje i Monaco kugirana inama na Sir Jim Ratcliffe, umwe mu banyamigabane bayo, kugira ngo bafate umwanzuro ku hazaza h’uyu mutoza kuri uyu wa Gatatu.

Biteganyijwe ko aba bayobozi basaba ko Carrick yirukanwa, nyuma yo gutsinda umukino umwe gusa mu mikino 10 ya Premier League, aho Manchester United iri ku mwanya wa 18 n’amanota umunani.

Pochettino w’imyaka 54, watoje Tottenham Hotspur, Southampton na Chelsea, ni umwe mu batoza Manchester United ibona nk’abashobora kuyifasha kuva mu bihe bikomeye.

Uyu mutoza afite amasezerano yo gutoza Leta Zunze Ubumwe za Amerika kugeza mu 2030, ku buryo Manchester United yaba isabwa kumvikana n’Ishyirahamwe ry’Umupira w’Amaguru muri Amerika kugira ngo imwegukane.

Amakuru avuga ko gusesa ayo masezerano bishobora gutwara miliyoni 7 z’Amapawundi.

Mu gihe yagirwa umutoza wa Manchester United, Pochettino yaba asubiye muri Premier League aherukamo ubwo yatandukanaga na Chelsea mu 2024.