Amakuru y’iyirukanwa ry’uyu mutoza w’imyaka 45 yatangajwe kuri uyu wa 12 Ugushyingo 2026.

Carrick yirukanywe nyuma y’inama yahuje abayobozi bakuru ba Manchester United, barimo Umuyobozi Mukuru Omar Berrada, ushinzwe umupira w’amaguru Jason Wilcox na Sir Jim Ratcliffe ufite imigabane muri iyi kipe. Iyi nama yabereye i Monaco ku wa Gatatu.

Iki cyemezo cyafashwe nyuma y’uko Manchester United inganyije na Aston Villa ibitego 4-4 ku Cyumweru, tariki ya 8 Ugushyingo, mu mukino watumye ikomeza kuguma mu mwanya wa 18 muri Premier League.

Manchester United yatsinze umukino umwe gusa mu mikino 10 ibanza ya Shampiyona y’uyu mwaka, bikaba ari byo bihe bibi kurusha ibindi iyi kipe yatangiranye umwaka w’imikino mu myaka 40 ishize.

Uyu mutoza yari amaze igihe ari ku gitutu, cyane cyane nyuma yo gutsindirwa mu rugo na Bournemouth ibitego 3-0 ku wa 25 Ukwakira 2026.

Icyo gihe abayobozi ba Manchester United bari bahisemo kumugumisha ku kazi, bamuha amahirwe yo gukosora ibitagenda neza mbere y’ikiruhuko cy’imikino y’amakipe y’ibihugu cyo mu Ugushyingo.

Gusa, umusaruro ntiwahindutse uko babyifuzaga, bituma hafatwa icyemezo cyo gutandukana na we.

Carrick yari yahawe akazi ko gutoza Manchester United by’agateganyo muri Mutarama 2026, asimbuye Ruben Amorim, mbere yo guhabwa amasezerano y’imyaka ibiri muri Gicurasi, yagombaga kurangira mu 2028.

Mu mikino 16 yatoje mu gice cya kabiri cy’umwaka ushize w’imikino, Carrick yari yatsinzemo 11, afasha Manchester United gusoreza ku mwanya wa gatatu no kubona itike yo gukina UEFA Champions League.

Gusa, umusaruro mubi wo mu ntangiriro z’uyu mwaka w’imikino wa 2026/27 watumye icyizere yari afitiwe n’abayobozi kigabanuka.

Mauricio Pochettino ni we uhabwa amahirwe yo kumusimbura

Umutoza w’Umunya-Argentine, Mauricio Pochettino, utoza Ikipe y’Igihugu ya Leta Zunze Ubumwe za Amerika, ni we uri imbere mu bahabwa amahirwe yo gusimbura Carrick.

Amakuru avuga ko Manchester United yamaze kugirana ibiganiro n’uyu mutoza w’imyaka 54, ndetse impande zombi zikaba zarageze ku bwumvikane ku bijyanye no kumuha akazi.

Pochettino wigeze gutoza Tottenham, Chelsea na Paris Saint-Germain, afite amasezerano muri Amerika arimo ingingo ishobora gutuma atandukana n’iyo kipe hatanzwe miliyoni 7 z’Amapawundi.

Manchester United izasubukura imikino ya Premier League ihura na Liverpool kuri Anfield, tariki ya 22 Ugushyingo 2026.