Uyu mukino uteganyijwe kuri iki Cyumweru, tariki ya 15 Ugushyingo 2026, kuri Stade ya Suez Canal Authority iri mu Mujyi wa Ismailia mu Misiri, guhera Saa Moya z’umugoroba ku isaha y’i Kigali.

Umutoni Aline ni we uba ari umusifuzi wo hagati, mu gihe Umutesi Alice aba ari umusifuzi wa mbere wo ku ruhande.

Aba Banyarwandakazi b’impanga, barafatanya na Mariem Chedad wo muri Mauritanie, uba ari umusifuzi wa kabiri wo ku ruhande, ndetse na Akissi Natacha Gérardine Konan wo muri Côte d’Ivoire, uba ari umusifuzi wa kane.

Abasifuzi bifashisha ikoranabuhanga rya VAR ni Maria Packuita Cynquela Rivet wo mu Birwa bya Maurice na Carine Atezambong Fomo wo muri Cameroun.

Uyu mukino ni uwa kabiri aya makipe ahuriyemo ku mukino wa nyuma w'iri rushanwa, nyuma y'uwo mu 2022, ubwo AS FAR yatsindaga Mamelodi Sundowns ibitego 4-0.

Mamelodi Sundowns yageze ku mukino wa nyuma itsinze Kawempe Muslim Ladies yo muri Uganda ibitego 4-1, mu gihe AS FAR yasezereye Lekié Football Filles yo muri Cameroun iyitsinze igitego 1-0.

Aya makipe yombi amaze kwegukana iki gikombe inshuro ebyiri. Mamelodi Sundowns yagitwaye mu 2021 na 2023, naho AS FAR igitwara mu 2022 na 2025.

Ikipe itsinda iraba iya mbere yegukanye CAF Champions League y'Abagore inshuro eshatu kuva iri rushanwa ritangiye gukinwa mu 2021.

Uretse igikombe, ikipe yegukana intsinzi irahabwa ibihumbi 600 by’Amadolari ndetse ibone itike yo gukina icyiciro cya kabiri cya FIFA Women's Champions Cup ya 2027, aho izahura na Naegohyang WFC yo muri Koreya ya Ruguru mu Ukuboza uyu mwaka.