Ni gahunda ihuriza hamwe aba bana bavukiye muri Canada cyangwa bahageze ari bato mu gihe cy’ibiruhuko mu rwego rwo kwirinda ko bazibagirwa inkomoko yabo.

Joy N. Mukama umwe muri aba babyeyi yatangarije IGIHE ko igitekerezo cyo gutangiza iri huriro cyashibutse ku bikorwa yabonye ku miryango y’Abashinwa n’Abahinde baba muri Canada bafite amashuri bigishirizamo abana babo indimi n’umuco by’iwabo.

Yavuze ko yatunguwe no kubona uburyo abo bana bato bavuga neza indimi z’iwabo mu gihe ababo bo mu Rwanda n’Abarundi bamwe na bamwe batabona uko bihugura ku ndimi n’umuco by’iwabo.

Ati “Iyi gahunda twayitangije mu ntangiriro ya Nyakanga nyuma yo kubona uburyo abana bato b’Abashinwa n’Abahinde ubona baganira bakavuga icyongereza cyiza ariko nanone bajya mu rurimi rwabo ukunva bararuvuga neza cyane.”

Yakomeje avuga ko byamukoze ku mutima atekereza ku buryo yafasha abana bato kwiga ururimi rw'iwabo no gutozwa umuco gakondo wabo.

Ati “Ibi bintu byarambabaje cyane ntangira gushakisha amakuru y’uko babigenza, nsanga benshi baza inaha bazanye na ba nyirakuru. Ugereranyije usanga nka buri rugo ruba rufite umubyeyi mukuru uhorana n’abana bato abigisha indangagaciro na kirazira by’umuco wabo kuko ababyeyi babo tungana baba bagiye gushakisha ubuzima.”

Yaje gusanga hari ibigo abo bana b’abanyamahanga bahuriramo buri cyumweru bakigishwa umuco na kirazira bigize umuco w’iwabo.

Iki gitekerezo yakigejeje kuri bagenzi be babiri Elodie Kabagema na Dorine Kanteyineza batuye mu Mujyi wa Vancouver baragishima bahita biyemeza gutegura umuhuro w’ibyumweru bibiri bahuriza hamwe abana 20 babatoza kubyina bya Kinyarwanda, ururimi, n’ibindi bigize umuco.

Muri iki gikorwa basuwe n’abantu batandukanye barimo Achille Karuletwa, Umuyobozi w'Umuryango w’Abanyarwanda batuye mu Ntara ya British Columbia muri Canada; Claude Nibizi, Umuyobozi wungirije mu Muryango w’Abarundi batuye muri iyi ntara na Janvier Katabarwa, Umunyarwanda ukina filime muri Canada yemerera aba babyeyi kubafasha aho bishoboka.

Uyu muryango usaba ubufasha bujyanye n’ibitabo by’Ikinyarwanda n’ibindi byafasha abana kwagura iki gikorwa kikaba ngarukakwezi cyangwa se buri cyumweru bitewe n’uko ubushobozi buzagenda bwiyongera burimo kubona inyubako bagishirizamo abana bavukiye hanze.