Aya masezerano yashyizweho umukono kuri uyu wa Gatatu, tariki ya 28 Ukwakira 2026, mu muhango wabereye muri BK Arena i Kigali, ni intambwe nshya muri gahunda yiswe “Basketball for Girls in Schools Programme”, izashyirwa mu bikorwa kuva mu 2026 kugeza mu 2030.

Iyi gahunda igamije guha abakobwa biga mu mashuri amahirwe yo gukina Basketball mu buryo buhoraho, kubona imyitozo iboneye no guteza imbere impano zabo, ari na ko bunguka ubumenyi bubafasha mu buzima bwa buri munsi.

Amashuri atanu yatoranyijwe azatangirirwamo iyi gahunda ni Lycée Notre Dame de Cîteaux yo mu Karere ka Nyarugenge, Maranyundo Girls School yo mu Bugesera, École Secondaire Saint Vincent Muhoza yo mu Karere ka Musanze, GS Mère du Verbe–Kibeho yo mu Karere ka Nyaruguru na Institut Sainte Famille yo muri Nyamasheke.

Aya mashuri yatoranyijwe nyuma y’isuzuma ryakozwe na FERWABA na Sport4Change Foundation, hagamijwe kureba ubushobozi bwayo bwo gushyira mu bikorwa iyi gahunda, ibikorwaremezo bya siporo afite n’uburyo ashobora gufasha abakobwa kwitabira Basketball.

Ni igikorwa gikurikira itangizwa ry’iyi gahunda muri Mutarama 2026, aho impande zombi zatangiye gushyiraho uburyo bwo guteza imbere Basketball y’abakobwa bahereye mu mashuri, hagamijwe kubaka urufatiro rw’iterambere ry’uyu mukino mu gihugu.

Mu cyiciro cya mbere, buri shuri rizaba rishobora kwandikisha abakobwa bagera kuri 20, bivuze ko amashuri yose uko ari atanu ashobora guhuriza hamwe abakobwa 100 bazahabwa imyitozo n’ubundi bufasha butandukanye.

Aba bakobwa bazahabwa imyitozo ya Basketball iteguye neza, amahugurwa abafasha kwigirira icyizere, gukorera hamwe, kugira ubushobozi bwo kuyobora no gufata ibyemezo bibafasha mu buzima.

Hazibandwa kandi ku kubafasha kugira ubuzima bwiza, kubaha amahirwe angana no kubahuza n’abantu bafite ubunararibonye bashobora kubagira inama no kubafasha gutera imbere.

Abazagaragaza impano zidasanzwe bazashobora kubona amahirwe yo gukomeza kuzamura urwego rwabo, binyuze mu makipe ya Basketball no mu yandi marushanwa abarizwa mu nzira y’iterambere ry’abakinnyi.

Amasezerano yashyizweho umukono ateganya ko buri shuri rizakorana na FERWABA na Sport4Change Foundation mu gutegura imyitozo, korohereza abakobwa kwitabira ibikorwa bya siporo no gutanga ibikorwaremezo bikenewe.

FIBA Foundation yatanze imipira 80 yo gushyigikira iyi gahunda

Kimwe mu byitezweho gutuma iyi gahunda igera ku ntego zayo ni ubufatanye na FIBA Foundation, umuryango ushamikiye ku Ishyirahamwe Mpuzamahanga rya Basketball (FIBA), wemeye gutanga inkunga y’ibikoresho n’amafaranga binyuze muri gahunda yawo ya “Basketball For Good”.

Muri ubwo bufatanye, FIBA Foundation yiyemeje gutanga imipira ya Basketball 80 yo mu bwoko bwa Molten, imyambaro ya siporo ya PEAK n’inkunga y’amafaranga azifashishwa mu bikorwa by’iyi gahunda.

Buri shuri muri atanu yatoranyijwe ryagenewe imipira 16, mu rwego rwo gufasha abakobwa kubona ibikoresho bihagije byo kwifashisha mu myitozo no mu bikorwa bitandukanye bya Basketball.

Uretse ibi bikoresho, FIBA Foundation izagira uruhare mu gutanga ubujyanama n’ubufasha mu ishyirwa mu bikorwa ry’iyi gahunda, cyane cyane mu gihe cyo kuva muri Kanama kugeza mu Ukuboza 2026.

Ubufatanye bw’izi nzego bugamije gukemura zimwe mu mbogamizi zishobora gutuma abakobwa batitabira Basketball uko bikwiye, zirimo kubura ibikoresho, amahirwe yo kubona imyitozo ihoraho n’uburyo bwo gukomeza guteza imbere impano zabo.

Biteganyijwe ko iki cyiciro cya mbere kizafasha FERWABA na Sport4Change Foundation kumenya imbogamizi zihari, gusuzuma umusaruro w’uburyo bwatoranyijwe no gutegura uko gahunda izagurirwa mu yandi mashuri.

Intego ni uko mu gihe cya gahunda ya 2026–2030, ibikorwa byayo bizagera ku mashuri agera kuri 30 yigamo abakobwa gusa, mu rwego rwo gutuma Basketball irushaho gukundwa no gukinwa n’abakobwa mu gihugu hose.

Sport4Change Foundation kandi yashishikarije ibigo bya Leta n’iby’abikorera, imiryango itandukanye n’abafatanyabikorwa mu iterambere kugira uruhare muri iyi gahunda, kugira ngo abakobwa benshi barusheho kubona amahirwe yo kwitabira siporo no guteza imbere uburezi bwabo.