Guverineri wa Tennessee, Bill Lee, yatangaje ibyo kwegura ku wa Gatandatu, mu itangazo yasohoranye na Strada. Uyu muyobozi yavuze ko kuva ku mirimo biri mu nyungu za leta, yemeza ko iperereza rikomeje ku byabaye rikwiye kandi rikenewe.

Lee yashimiye Strada kuba yarakoranye ubunyangamugayo no kuba yemeye gushyira imbere inyungu z’abaturage ba Tennessee muri ibi bihe bikomeye.

Pike yahawe igihano cy’urupfu mu 1996, ahamijwe kwica Colleen Slemmer. Ku wa Gatatu, yatewe inshinge ebyiri z’umuti wa pentobarbital zagombaga kumwica, ariko akomeza kubaho. Nyuma yajyanywe mu bitaro n’imbangukiragutabara.

Abanyamategeko be bavuga ko igihe yaterwaga izo nshinge, yumvikanaga arira, aniha kandi ahumeka cyane. Ku wa Kane nijoro, yari yataye ubwenge, ashyirwa ku mashini zimufasha guhumeka.

Inyandiko zashyikirijwe urukiko zigaragaza ko ari kuvurirwa mu bitaro byo muri Nashville, aho abaganga bagerageza gukura mu mubiri we imiti yakoreshejwe mu gushaka kumwica.

Guverineri Lee yategetse ko hakorwa isuzuma ryigenga ku byabaye, anahagarika ibikorwa byose byo gushyira mu bikorwa ibihano by’urupfu muri Tennessee muri uyu mwaka.

Abanyamategeko ba Pike bavuze ko kwegura kwa Strada bifite ishingiro, ariko ko ntacyo bifasha umukiliya wabo ubu. Bavuga ko ibyabaye bigaragaza imikorere mibi irenze umuntu umwe, bagasaba ko isuzuma ryigenga rigaragaza ibibazo bikomeye biri mu buryo Tennessee ishyira mu bikorwa igihano cy’urupfu.

Urwego rushinzwe amagereza rwavuze ko rushyigikiye uburyo bwakoreshejwe, ruvuga ko amabwiriza atemerera abakozi gukora ibindi birenze ibyakozwe. Abayobozi ntibarasobanura icyagenze nabi cyangwa niba bazongera kugerageza kwica Pike.

Ku wa Gatanu, abanyamategeko be basabye urukiko byihutirwa ko ibimenyetso byose bifitanye isano n’icyo gikorwa bibungabungwa. Abanyamategeko be bakomeje gusaba ko igihano cye cy’urupfu gisimbuzwa ikindi gihano.

Igikorwa cyo kumwica cyakomeje nyuma y’uko ubusabe bwinshi bwo kugihagarika butemewe. Urukiko rw’Ikirenga rwa Amerika rwanze ubusabe inshuro ebyiri zitandukanye, naho Guverineri Lee yanga kumuha imbabazi.

Pike ni we mugore wenyine wari utegereje igihano cy’urupfu muri Tennessee. Yari afite imyaka 18 ubwo we n’umukunzi we w’icyo gihe, Tadaryl Shipp, bakubitaga, bagashinyagurira kandi bakica Slemmer wari ufite imyaka 19 mu 1995. Ubu bwicanyi bwabereye i Knoxville, butuma inkuru ye ivugwa cyane mu bitangazamakuru mbere yo gukatirwa igihano cy’urupfu mu mwaka wakurikiyeho.