Iyo mpanuka yabaye mu ijoro ryo ku wa Gatandatu, tariki ya 26 Nzeri 2026. Umuyobozi w’Umudugudu wa Kisheke uri hafi y’ahabereye impanuka, Félix Habiragi, yavuze ko ubwato bwari burimo abantu barenga 50, naho abagera kuri 15 bakaba bari bamaze gutabarwa.

Ubwato bwari butwaye abacuruzi b’amafi n’ibicuruzwa, buva i Bwina bwerekeza i Boza, ibice byombi biri ku Kirwa cya Idjwi. Icyateye iyo mpanuka nticyari cyamenyekanye.

Impanuka z’ubwato zikunze kuba muri RDC, aho abantu benshi bifashisha ibiyaga n’inzuzi mu ngendo zabo. Hari ubwo ubwato butwara abantu n’imizigo birenze ubushobozi bwabwo, mu gihe bamwe mu bagenzi baba badafite amakoti abarinda kurohama.

Dorcelle Bagazane, umwe mu bagize sosiyete sivile kuri Idjwi, yavuze ko nubwo abayobozi batangiye gusaba abagenzi kwambara ayo makoti, hari benshi bagikora ingendo batayafite.