Guverinoma ya Leta Zunze Ubumwe za Amerika yari isanzwe ishinja Maduro ibyaha by’iterabwoba rifitanye isano n’ubucuruzi bw’ibiyobyabwenge, gucuruza ibiyobyabwenge n’ibyaha bifitanye isano n’intwaro. Mu cyumweru gishize, yongeyeho ibindi byaha imurega we n’umugore we.

Maduro na Flores bafashwe muri Mutarama mu gikorwa cya gisirikare cy’ingabo za Amerika, bajyanwa i New York, aho bagifungiye. Urubanza rwabo ruteganyijwe muri Kamena 2027.

Mu nyandiko nshya y’ibirego, ubushinjacyaha bwavuze ko bombi bashyizeho kandi bakomeza gukoresha uburyo bw’urugomo bwo gukandamiza abaturage, bwatumye Abanya-Venezuela ibihumbi bicwa, batotezwa kandi bakorerwa iyicarubozo.

Maduro yabwiye urukiko ko ibyo aregwa ari ibinyoma, kimwe n’ubuhamya bushingirwaho mu kumushinja.

Avuga mu cy’Espagnol, yifashishije umusemuzi, yagize ati “Mpakanye burundu iyi nyandiko.”

Umucamanza Alvin Hellerstein yamuciye mu ijambo, avuga ko urukiko rwandika ko ahakana ibyaha aregwa.

Flores na we abinyujije ku musemuzi, yagize ati “Ndi umwere rwose. Nta cyaha mfite.”

Bombi bari bambaye imyenda y’abafungwa kandi bagaragaraga nk’abatakaje ibiro mu gihe bamaze bafungiye i Brooklyn.

Ubushinjacyaha buvuga ko uburyo bw’iyicarubozo bwakoreshwaga burimo gukubitisha abantu amashanyarazi, kubabuza guhumeka, kubafata ku ngufu, kubahatira kwambara ubusa, kubafungira bonyine igihe kirekire, kubicisha inzara no kubakorera iyicarubozo ryo mu mutwe.

Amerika inashinja Maduro kwemerera iyicarubozo gukorerwa abantu runaka, ikavuga ko n’abaturage bayo barikorewe muri ubwo buryo.

Ubushinjacyaha bwari bwaranashinje Maduro, umugore we, umuhungu we n’abo bafatanyaga gucura umugambi wo gucuruza cocaine no gukorana n’imitwe y’abacuruza ibiyobyabwenge yashyizwe ku rutonde rw’imitwe y’iterabwoba.

Maduro yari yaravuze ko ibyo birego ari igikoresho cyo gushyira mu bikorwa imigambi y’ubutegetsi bw’amahanga bwo kwigarurira ububiko bwinshi bwa peteroli bwa Venezuela.

Abunganizi be n’ab’umugore we bavuga ko Maduro ari umuyobozi w’igihugu cyigenga, bityo akaba afite ubudahangarwa bumurinda gukurikiranwa n’inkiko. Banavuga ko kuba Amerika yaramutwaye ku ngufu binyuranyije n’amategeko.

Bombi basabye ko urubanza ruhagarikwa hashingiwe kuri ubwo budahangarwa. Icyakora, kugeza ubu bakomeje gufungwa, mu gihe bitegura kuburanishwa ku byaha bahakana ko bakoze.

Flores yari yaranasabye kurekurwa by’agateganyo atanze ingwate, ariko icyifuzo cye nticyakiriwe.

Yavugaga ko afite ibibazo by’umutima n’izindi ndwara mu gihe afungiye muri Gereza ya Metropolitan Detention Center i Brooklyn.

Ibyaha bishya by’iyicarubozo byongewe ku birego bisanzwe, aho ubushinjacyaha buvuga ko Maduro na Flores bagize uruhare mu gukomeza ubwo buryo bwo gukandamiza abaturage.

Mu iburanisha ryo ku wa Kane, bombi bakomeje guhakana ibyo baregwa, mu gihe abunganizi babo bashimangira ko urukiko rutagomba kubakurikirana kubera ubudahangarwa bavuga ko bafite.