Uruganda rwenga ibinyobwa rwa SKOL Brewery Ltd rwahaye buruse abana 100 b’abakozi barwo biga mu mashuri yisumbuye, binyuze muri gahunda ya buruse rusanzwe rutanga buri mwaka, hagamijwe guteza imbere uburezi no korohereza ababyeyi mu kwishyurira abana babo amashuri.

Aba banyeshuri bahawe buruse y' umwaka w’amashuri wa 2026/2027, mu rwego rwo gukomeza gahunda uru ruganda rwatangije mu 2021, igamije gufasha abana b’abakozi barwo kubona uburezi no gukomeza amasomo yabo nta nkomyi.

Iyi gahunda yashyizweho ku gitekerezo no ku bufasha bwa Maïté Relecom, umubyeyi wa nyiri uruganda rwa SKOL akaba no mu buyobozi bwa Unibra, itsinda ry’ibigo byo mu Bubiligi rifite na SKOL Brewery Ltd.

Kuva yatangizwa, iyi gahunda yagiye yaguka uko imyaka ishira, aho abana b’abakozi ba SKOL Brewery Ltd bahabwa buruse zo kwiga mu mashuri yisumbuye, ay’imyuga n’ubumenyingiro ndetse no muri kaminuza.

Mu mwaka w’amashuri wa 2026/2027, SKOL yahisemo gukomeza gushyigikira uburezi bw’abana b’abakozi bayo, aho abanyeshuri 100 bo mu mashuri yisumbuye bakaba baramaze kwishyurirwa buruse bahawe.

Iyi gahunda igamije kugabanya umutwaro w’amafaranga y’ishuri ku miryango y’abakozi, no gufasha abana gukomeza amasomo yabo bafite ibyangombwa nkenerwa.

Buruse zitangwa muri iyi gahunda zishobora gufasha ababyeyi kwishyura amafaranga y’ishuri n’ibindi bikenerwa n’abanyeshuri, birimo imyambaro y’ishuri, ibitabo n’amafaranga y’ingendo zitegurwa n’ibigo by’amashuri.

Mu buryo busanzwe, abakozi bifuza ko abana babo bahabwa izi buruse basabwa kuzuza impapuro zabugenewe no gutanga ibyangombwa bisabwa, hakabaho isuzuma rigamije kumenya abujuje ibisabwa.

Gahunda ya buruse ya SKOL Brewery Ltd yatangiye mu mwaka w’amashuri wa 2021/2022, ubwo abanyeshuri 59 bo mu mashuri yisumbuye n’abandi 6 biga muri kaminuza bahabwaga ubufasha.

Mu mwaka wakurikiyeho wa 2022/2023, uru ruganda rwatanze buruse 68 ku bana b’abakozi barwo biga mu mashuri yisumbuye.

Mu 2023/2024, abanyeshuri 58 bo mu mashuri yisumbuye bahawe buruse, mu cyiciro cya gatatu cy’iyi gahunda.

Mu 2024/2025, SKOL Brewery Ltd yatangije icyiciro cya kane, icyo gihe igaragaza ko kuva gahunda yatangira, abanyeshuri barenga 265 bo mu mashuri yisumbuye n’abarenga 30 bo mu mashuri makuru na kaminuza bari bamaze kugenerwa ubufasha.

Mu mwaka w’amashuri wa 2025/2026, uru ruganda rwatanze buruse 94, zirimo 78 z’abanyeshuri bo mu mashuri yisumbuye na 16 z’abiga muri kaminuza.

Kuba mu mwaka w’amashuri wa 2026/2027 SKOL igiye kwishyurira amashuri abana 100 bo mu mashuri yisumbuye, bivuze ko umubare w’abanyeshuri bo kuri urwo rwego bazahabwa buruse wiyongereyeho 22 ugereranyije n’umwaka wabanje.

Uruganda rwa SKOL rwatangije icyiciro cya kabiri cyo guha buruse abana b’abakozi bayo