Iyi mibare ikubiye muri raporo y’ibikorwa by’umwaka wa 2025/2026 Umuyobozi Mukuru w’Urwego rw’Imiyoborere RGB, Dr. Doris Uwicyeza Picard yagejeje ku Nteko Ishinga Amategeko imitwe yombi ku wa 11 Ugushyingo 2026.

Iyi raporo igaragaza ko mu bushakashatsi bwa 2026, bwerekeye ishusho y’uko abaturage babona imiyoborere n’imitangire ya serivisi mu nzego zibegereye 

Imibare y’Urwego rw’Igihugu rw’Imiyoborere, RGB, iri muri raporo y’ibikorwa by’umwaka wa 2025–2026, igaragaza ko abaturage bishimiye imiyoborere n’imitangire ya serivisi ku mpuzandengo ya 73,8%, ivuye kuri 76,7% mu 2025.

Nubwo umutekano wakomeje kuyobora ibindi byiciro, igipimo cyawo cyagabanyutse, kiva kuri 92,1% mu 2025 kigera kuri 91,5% mu 2026.

Uru rwego rukuriwe n’iyubahirizwa ry’amahame y’imiyoborere n’icyizere abaturage bafitiye inzego z’ubuyobozi, biri kuri 88,8%, bivuye kuri 90,1%. Uruhare rw’abaturage mu bibakorerwa ruza ku mwanya wa gatatu na 86,5%, ruvuye kuri 88,2%.

Ubutabera buri ku gipimo cya 79,1%, buvuye kuri 81,3%, mu gihe uburezi buri kuri 75,4%, buvuye kuri 79,4%. Isuku iri kuri 75%, ivuye kuri 76,1%.

Ku bijyanye n’inzego z’ibanze, abaturage bazishimiye ku gipimo cya 74%, kivuye kuri 77,1%. Imibereho y’umuryango nyarwanda iri kuri 73%, ivuye kuri 74,7%, naho ikoranabuhanga n’itumanaho biri kuri 72%, bivuye kuri 73,4%.

Ubworozi bwagize amanota 71,4%, buvuye kuri 76,5%, mu gihe urwego rw’abikorera rwagize 70,4%, ruvuye kuri 73,3%.

Gahunda zo kuzamura imibereho no kwita ku batishoboye ni cyo cyiciro cyonyine cyazamutse mu byiciro 16. Cyagize amanota 69,7%, kivuye kuri 69,6% mu 2025.

Mu byiciro byagize amanota make harimo ubuzima, buri kuri 64,9%, buvuye kuri 72,4%; ubutaka, imiturire n’ibidukikije biri kuri 63,6%, bivuye kuri 65,7%; n’ibikorwaremezo biri kuri 63,5%, bivuye kuri 66,4%.

Ubuhinzi buri ku mwanya wa nyuma n’amanota 62%, buvuye kuri 70,6%. Ni na bwo bwagize igabanyuka rinini kurusha ibindi byiciro, ry’amanota 8,6% ku ijana, bugakurikirwa n’ubuzima bwagabanyutseho amanota 7,5%.

Depite Kayigire Therence yagaragaje impungenge kuri iki kigero cy’uburyo abantu bishimira imiyoborere n’imitangire ya serivisi kigenda kigabanyuka.

Ati “Mu byiciro hafi ya byose 16 byasuzumwe usanga twarasubiye inyuma. Amanota yarasubiye inyuma muri uyu mwaka, mu buryo abaturage bishimira imiyoborere n’imitangire ya serivisi. Mu kanya twanabwiwe ahubwo ko urwego rw’ubuhinzi ari na rwo rufite amanota make, bikaba biteye impungenge kuko ni na cyo cyiciro gitunze Abanyarwanda benshi…”

Dr. Picard Uwicyeza yavuze ko abaturage batishimira imitangire ya serivisi y’ubuhinzi 93% bavuze ko ari imihindagurikire y’ibihe, n’indwara z’ibihingwa zatumye 88,7% bagaragaza ko batishimiye iyi serivisi.

Ati “Ku gipimo cya 77% batubwira ko bafite inganda nke zitunganya umusaruro w’ubuhinzi, na 77% batubwira ko badafite ububiko buhagije. Ni ukuvuga ko uruhererekane nyongeragaciro rwose rw’ubuhinzi rufite ikibazo.”

“Hakaba ibihingwa babashije guhinga birwaye wabasha no gusarura ugasanga inganda zibitunganya ni nke, nta bubiko, ni ibibazo by’uruhurirane bigenda bituma ubuzima bw’umuturage imitangire ya serivisi atayishimira.”

Musanze iyoboye uturere

Musanze iri ku mwanya wa mbere n’amanota 79,89%, ivuye kuri 77,83% mu 2025.

Ikurikiwe na Ruhango ifite 78,24%, ivuye kuri 75,85%, na Nyanza ifite 77,28%, ivuye kuri 80,30%.

Ngoma iri ku mwanya wa kane n’amanota 76,72%, igakurikirwa na Kicukiro ifite 76,60%. Gakenke yagize 76,52%, Gisagara igira 76,03%, naho Huye igira 75,83%.

Gatsibo iri ku mwanya wa cyenda n’amanota 75,23%, ivuye kuri 70,40%. Yazamutseho amanota 4,83 ku ijana, ari na yo yagize izamuka rinini mu turere. Nyaruguru isoza uturere icumi twa mbere n’amanota 75%.

Ku rundi ruhande, Karongi iza ku mwanya wa nyuma n’amanota 65,17%, ivuye kuri 71,27% mu 2025. Rutsiro iri ku mwanya wa 29 na 68,47%, naho Kayonza ikaba iya 28 na 69,51%.

Imibare igaragaza ko amanota y’uturere yazamutse muri Musanze, Ruhango, Gatsibo, Rwamagana na Kayonza, mu gihe mu tundi 25 yagabanutse ugereranyije n’umwaka wabanje.