Nk’uko ibitangazamakuru byo mu Butaliyani byabitangaje, umuryango we ni wo wamenyesheje abantu iby’urupfu rwe, umwibuka nk’umuhanga “mu gukora imikufi y’agaciro uruta abandi bose bo mu gihe cye”.

Paolo Bulgari yari Umuyobozi w’Inama y’Ubutegetsi ya Bvlgari Group kuva mu 1984. Imikufi y’iki kigo yambarwaga n’ibyamamare by’i Hollywood n’abo mu miryango y’abami barimo Diana, Igikomangomakazi cya Wales.

Mu butumwa Bvlgari yashyize kuri internet imwunamira, yamwibutse nk’“uwari ku mutima w’ubuhanzi bwayo”, ivuga ko ibikorwa bye “bizakomeza gutera imbaraga abazavuka mu bisekuru bizaza”.

Ikigo Bulgari cyashinzwe i Roma mu mpera z’Ikinyejana cya 19 na sekuru, Sotirios Voulgaris, Umugereki wakoraga imikufi mu ifeza. Nyuma yahinduye izina rye arihuza n’Igitaliyani yitwa Bulgari.

Voulgaris yakomokaga i Paramythia, umudugudu wo mu misozi yo mu gace ka Epirus, mu Majyaruguru ashyira Uburengerazuba bw’u Bugereki, uzwiho imikufi ikozwe mu ifeza. Yahunze ubutegetsi bw’ubwami bwa Ottoman, atura i Naples mbere yo gufungura iduka i Roma.

Paolo Bulgari yatangiye gukorera mu kigo cy’umuryango we nyuma gato yo kuva ku ntebe y’ishuri. Yabaye inzobere mu mabuye y’agaciro y’amabengeza, aza kuyobora icyo kigo no gucunga imikurire yacyo ku rwego mpuzamahanga.

Umuryango wa Bulgari wakundaga gukoresha amabuye y’agaciro y’amabengeza akoreshwa mu mikufi n’imitako na zahabu y’umuhondo werurutse, ugakora imitako minini kandi ugahuza amabara mu buryo butamenyerewe. Ibyo byatumaga imitako yawo itandukana n’iy’inzu z’i Paris zari zizwiho gukora imitako yoroheje kandi inoze.

Iki kigo cyinjiye ku masoko y’ibicuruzwa nk’ibi byihagazeho, cyagura ibikorwa byacyo kinatangira gukora amasaha, imibavu n’ibikoresho by’uruhu, ndetse kinashora imari mu mahoteli.

Mu butumwa Bvlgari yashyize ku mbuga nkoranyambaga, yagize iti “Paolo Bulgari yatangiye gukorana na se mu 1960, yibanda ku bumenyi bw’amabuye y’agaciro, aza kuba umwe mu nzobere zikomeye kuri yo ku isi. Yanakomeje kunoza ubushobozi bwe bwo kwitegereza no gutahura ubwiza, ari na byo shingiro ry’imiterere yihariye y’imitako ya Bvlgari.”

Muri ubwo butumwa harimo n’amagambo ya Paolo Bulgari wagize ati “Ikintu cyose gishobora kuba isoko y’inganzo. Guhanga nta mategeko bigira. Nta na rimwe.”

Mu byamamare byabaye abakiliya b’iki kigo harimo Elizabeth Taylor, Audrey Hepburn, Marilyn Monroe, Ingrid Bergman, Sophie Loren, Anne Hathaway, Zendaya na Rihanna.

Mu 2011, umuryango wa Bulgari wagurishije imigabane igurwa na LVMH, itsinda ry’ibigo byo mu Bufaransa bicuruza ibicuruzwa byihagazeho, mu masezerano yari afite agaciro ka miliyari 3,7 z’Amayero.

Mu 2019, Paolo Bulgari n’umugore we bashinze umuryango Paolo Bulgari Foundation kugira ngo bafashe urubyiruko rwo mu duce dukennye two mu nkengero za Roma kubona amashuri n’amahugurwa y’imyuga.

Biteganyijwe ko umuhango wo kumusezeraho uzabera i Roma ku wa Mbere, tariki ya 23 Ugushyingo, muri Bazilika ya Santa Croce in Gerusalemme.

Umutaliyani Paolo Bulgari wamenyekanye mu bucuruzi bw’imikufi yihagazeho yitabye Imana