Ubukwe bw’aba bombi bwabaye ku Cyumweru, tariki ya 8 Ugushyingo 2026, bubera muri Jalia Hall & Garden mu Mujyi wa Kigali, buhuza imiryango, inshuti n’abavandimwe bari baje kwifatanya na bo mu ntambwe nshya y’ubuzima.

Ibirori byaranzwe n’udushya dutandukanye, birimo uburyo impeta z’abageni zazanywe na Drone mu muhango wo gusezerana imbere y’Imana, ndetse n’impano zitandukanye zahawe abageni.

Kimwe mu byaranze ibi birori ni impano y’inka Clapton Kibonge yagabiye Nana Nadine n’umugabo we, abifuriza umugisha n’iterambere mu rugo rushya batangiye.

Umuhanzi Massamba Intore ni we wasohoye umugeni, mu gihe Christopher Muneza na Joshua Ishimwe basusurukije abitabiriye ibirori binyuze mu ndirimbo zabo. DJ Sonia na we yataramiye abari aho, mu gihe Itorero Intayoberana ryasusurukije abitabiriye imbyino gakondo.

Mu byamamare byitabiriye ubu bukwe harimo Titi Brown, Niyitegeka Gratien uzwi nka Seburikoko, Bamenya, Bahavu Uwase Tracy, Madederi, Tessy, Dr Nsabi, DJ Diddyman na Rwego Yves.

Zacu Entertainment isanzwe ikorana na Nana Nadine na yo yagabiye impano abageni, inashimira uyu mukinnyi wa filime ku mico myiza yamuranze.

Urukundo rwa Nana Nadine na Gafenge Fred rwageze ku yindi ntera ku wa 15 Nyakanga 2026, ubwo Gafenge yamwambikaga impeta amusaba kuzamubera umugore, na we akabyemera. Nyuma yaho, ku wa 29 Ukwakira 2026, basezeranye imbere y’amategeko.

Nana Nadine ni umwe mu bakinnyi ba filime bazwi mu Rwanda, wamamaye muri filime zirimo ‘City Maid’, ‘Maya’ na ‘Hurts Harder’. Mu mishinga ye aheruka harimo na filime ye bwite yise ‘Stain’.