Minisitiri w’Ububanyi n’Amahanga n’Ubutwererane, Amb. Olivier Jean Patrick Nduhungirehe, yifatanyije n’abayobozi bo muri Suède, Abanyarwanda bahatuye n’inshuti z’u Rwanda mu muhango wo gutaha ikimenyetso cy’urwibutso rwa Jenoside yakorewe Abatutsi mu 1994, rwashyizwe mu Mujyi wa Stockholm.
Uyu muhango wabaye kuri uyu wa 21 Ugushyingo 2026, ugamije guha icyubahiro abasaga miliyoni bishwe muri Jenoside yakorewe Abatutsi, kuzirikana abayirokotse no gushimangira inshingano rusange zo kurinda ukuri ku mateka yayo no gukumira ko amahano nk’ayo yazongera kubaho.
Minisiteri y’Ububanyi n’Amahanga n’Ubutwererane y’u Rwanda yatangaje ko uru rwibutso ari ikimenyetso cy’ubufatanye mu kubungabunga amateka ya Jenoside yakorewe Abatutsi no guharanira ko abazize Jenoside yakorewe Abatutsi mu 1994 batazibagirana.
Minisitiri Nduhungirehe yashimiye Guverinoma ya Suède, Ubuyobozi bw’Umujyi wa Stockholm, Kiliziya ya St. Maria Magdalena, Umuryango Ibuka Sweden n’abandi bose bagize uruhare mu gutuma uru rwibutso rushyirwaho.
Yagaragaje ko u Rwanda rushimira ubwitange bw’abagize uruhare muri iki gikorwa cyo guha icyubahiro abazize Jenoside yakorewe Abatutsi mu 1994.
Uru rwibutso rushyizweho nk'ikimenyetso cyo kwifatanya n'abarokotse Jenoside yakorewe Abatutsi, kubungabunga ukuri ku mateka yayo no kwibutsa abatuye Isi inshingano bafite zo kurwanya ingengabitekerezo ya Jenoside n'ibikorwa byose bishobora kuyiganishaho.
Jenoside yakorewe Abatutsi mu 1994 yahitanye ubuzima bw'Abatutsi barenga miliyoni mu gihe cy'iminsi 100.








Ibitekerezo 0