Ni ibikubiye mu iteganyagihe Meteo Rwanda yashyize hanze ku wa 20 Ugushyingo 2026, rigaragaza uko ikirere kizaba kimeze kuva ku wa 21 kugeza ku wa 30 Ugushyingo.

Meteo Rwanda yagaragaje ko muri icyo gihe hateganyijwe imvura iri hagati ya milimetero 25 na 100, mu gihe impuzandengo y’isanzwe igwa iri hagati ya milimetero 23 na 86.

Iyo mvura izagwa mu gihe cy’iminsi iri hagati y’itatu n’itandatu, bitewe n’imiterere ya buri gace.

Imvura nyinshi iri hagati ya milimetero 80 na 100 iteganyijwe mu Karere ka Nyamasheke, ibice byinshi bya Nyaruguru, Rusizi na Nyamagabe ndetse n’ibice by’amajyepfo bya Karongi.

Imvura iri hagati ya milimetero 60 na 80 iteganyijwe mu bindi bice by’Intara y’Iburengerazuba, ibice bisigaye bya Nyamagabe na Nyaruguru, Akarere ka Musanze, ibice byinshi bya Burera, Gakenke na Huye.

Iyi mvura kandi izagwa mu bice by’uburengerazuba bwa Gisagara, Nyanza na Ruhango, ndetse n’ibice by’uburengerazuba n’amajyaruguru bya Muhanga.

Mu bindi bice by’Intara y’Amajyepfo n’iy’Amajyaruguru, ibice byinshi by’Umujyi wa Kigali ndetse n’ibice by’uburengerazuba bwa Nyagatare, Gatsibo na Bugesera, hateganyijwe imvura iri hagati ya milimetero 45 na 60.

Ahasigaye mu gihugu hateganyijwe imvura iri hagati ya milimetero 25 na 45.

Meteo Rwanda yasobanuye ko iyi mvura izaterwa n’isangano ry’imiyaga riherereye mu gice cy’amajyaruguru y’Isi, ririmo kumanuka rigana mu karere u Rwanda ruherereyemo.

Ku bijyanye n’ubushyuhe, ku manywa hateganyijwe uburi hagati ya dogere Selisiyusi 20 na 30, mu gihe nijoro buzaba hagati ya dogere 10 na 19.

Ubushyuhe bwinshi bwo ku manywa, buri hagati ya dogere 28 na 30, buteganyijwe cyane cyane mu Burasirazuba, mu bice byinshi bya Kigali, mu Mayaga no mu kibaya cya Bugarama.

Muri icyo gihe kandi hateganyijwe umuyaga ufite umuvuduko uri hagati ya metero eshatu na 12 ku isegonda.

Meteo Rwanda yasabye abaturage, by’umwihariko abatuye ahateganyijwe imvura n’umuyaga mwinshi, gufata ingamba zo kwirinda ingaruka zabyo no gukurikiza amabwiriza ya Minisiteri ishinzwe Ibikorwa by’Ubutabazi, MINEMA.