Ibi bikubiye mu iteganyagihe ryashyizwe ahagaragara ku wa 1 Ugushyingo 2026, rigaragaza uko ikirere kizaba kimeze kuva ku wa 1 kugeza ku wa 10 Ugushyingo.
Meteo Rwanda yasobanuye ko imvura isanzwe igwa muri iki gice cy’ukwezi iba iri hagati ya milimetero 25 na 106, mu gihe iyitezwe ishobora kugera kuri milimetero 120.
Biteganyijwe ko imvura izagwa mu gihe cy’iminsi iri hagati y’ine n’itandatu, bitewe n’imiterere ya buri gace.
Uturere twa Musanze, Nyabihu na Ngororero turi mu duteganyijwemo imvura nyinshi, iri hagati ya milimetero 90 na 120.
Iyo mvura kandi iteganyijwe mu bice byinshi by’uturere twa Rubavu, Rutsiro, Gakenke, Rusizi, Nyamasheke na Nyamagabe, hamwe n’ibice bimwe by’uturere twa Nyaruguru, Karongi, Huye, Muhanga na Burera.
Mu bindi bice by’Intara y’Uburengerazuba, hamwe n’ibice bimwe by’Intara y’Amajyepfo n’iy’Amajyaruguru, hateganyijwe imvura iri hagati ya milimetero 60 na 90.
Ibice byinshi by’Umujyi wa Kigali, hamwe n’ibice bimwe by’uturere twa Bugesera, Rwamagana, Gatsibo na Nyagatare, biteganyijwemo imvura iri hagati ya milimetero 45 na 60.
Ahasigaye mu gihugu hateganyijwe imvura iri hagati ya milimetero 30 na 45.
Meteo Rwanda yasobanuye ko iyi mvura izaterwa n’isangano ry’imiyaga rituruka mu gice cy’amajyaruguru y’Isi ryerekeza mu karere u Rwanda ruherereyemo, hamwe n’imiyaga ituruka mu Nyanja y’Abahinde.
Uretse imvura, Meteo Rwanda yateganyije ko mu bice bitandukanye by’igihugu hazaba umuyaga ufite umuvuduko uri hagati ya metero enye na 12 ku isegonda.
Umuyaga mwinshi ufite umuvuduko uri hagati ya metero umunani na 12 ku isegonda uteganyijwe cyane cyane mu bice by’uturere twa Karongi, Ngororero, Rutsiro, Rubavu, Nyabihu, Nyamagabe, Muhanga, Ruhango na Kamonyi.
Kubera uwo muyaga, Meteo Rwanda yasabye abaturage gukomeza gufata ingamba zo kwirinda ingaruka zishobora guterwa n’imvura ivanze n’umuyaga mwinshi.
Yagize iti “METEO RWANDA iragira inama Abaturarwanda gukomeza gufata ingamba zo kwirinda ingaruka zaturuka ku mvura irimo umuyaga mwinshi bakurikiza amabwiriza bahabwa na Minisiteri ishinzwe Ibikorwa by'Ubutabazi (MINEMA).”
Ku bijyanye n’ubushyuhe, Meteo Rwanda yateganyije ko ubwo ku manywa buzaba buri hagati ya dogere Selisiyusi 20 na 30, naho ubwo nijoro bukaba hagati ya dogere 10 na 19.
Ubushyuhe bwinshi bwo ku manywa, buri hagati ya dogere 28 na 30, buteganyijwe mu Karere ka Bugesera, ibice byinshi by’Umujyi wa Kigali n’uturere two mu Ntara y’Iburasirazuba, hamwe n’ibice by’Amayaga n’Ikibaya cya Bugarama.
Ubushyuhe buke bwo ku manywa, buri hagati ya dogere 20 na 22, buteganyijwe mu bice by’uturere twa Musanze na Nyabihu.
Meteo Rwanda yasabye abaturage gukurikiranira hafi amakuru y’iteganyagihe n’amabwiriza atangwa n’inzego zishinzwe ubutabazi, kugira ngo birinde ingaruka zishobora guterwa n’imvura n’umuyaga mwinshi.





Ibitekerezo 0