Abanyarwanda bo hirya no hino mu gihugu bitabiriye amatora yo ku rwego rw’Akagari kuri uyu wa 31 Ukwakira 2026, agamije kuzuza Inama Njyanama z’Utugari no gushyiraho abahagararira abaturage mu nzego zitandukanye. Bamwe mu batowe bagaragaje ko bashyize imbere iterambere ry’abaturage no kongera uruhare rw’urubyiruko mu miyoborere.

Ngirinshuti Isimbi Kevine wo mu Murenge wa Kagarama watorewe kujya mu bajyanama b’abagore bagize nibura 30% by’Inama Njyanama y’Akagari, yavuze ko icyizere yagiriwe kimwereka ko urubyiruko rufite umwanya mu kubaka igihugu, ruhereye aho rutuye.

Uyu mukobwa wiga icyiciro cya gatatu cya kaminuza mu micungire y’ubucuruzi muri Oklahoma Christian University, yasabye bagenzi be kwigirira icyizere no gutanga umusanzu wabo.

Ati “Wikitinya urashoboye, zana icyo ushoboye ufatanye n’abandi kubaka igihugu.”

Yavuze ko akiri muto yumvaga ko inshingano nk’izi zigenewe abantu bakuru gusa, ariko ubu akaba abona ko n’urubyiruko rushoboye kuzisohoza.

Rutayisire Pascal, watorewe guhagararira Akagari ka Rukatsa mu Nama Njyanama y’Umurenge wa Kagarama, na we yavuze ko icyizere yagiriwe kimusaba gukorana n’abaturage mu guteza imbere imibereho yabo.

Yagaragaje ko azita ku bikorwa remezo, ubutabera no gusigasira ibyagezweho, by’umwihariko akibanda ku burezi no ku kibazo cy’abana bata ishuri.

Ati “Turwanya rero ikintu cy’igwingira mu bana, tukarwanya ikintu cyo guta amashuri ariko n’abarangije amashuri tukabashishikariza kwihangira imirimo abatayifite.”

Rutayisire yongeyeho ko gushishikariza urubyiruko kwiyungura ubumenyi, kwiteza imbere no kwitabira gahunda z’igihugu biri mu byo azakomeza gushyira imbere.

Perezida w'Urukiko rw'Ikirenga, Mukantaganzwa Domitilla, yitabiriye amatora y’abayobora utugari. Yatoreye mu Karere ka Kicukiro atuyemo.

Minisitiri w’Imari n’Igenamigambi, Yusuf Murangwa na Minisitiri w’Ubumwe n’Uburere Mboneragihugu, Dr Bizimana Jean Damascène, ni bamwe mu bitabiriye amatora. 

Abandi barimo Gatabazi JMV wigeze kuba Minisitiri w’Ubutegetsi bw’Igihugu na Dr. Jimmy Gasore wahoze ari Minisitiri w’Ibikorwaremezo ndetse na Amb Mutsindashyaka Théoneste bitabiriye amatora mu Karere ka Kicukiro.

Bamwe mu baturage bitabiriye amatora kuri site y’itora ya ADEPR Ngarama, mu Murenge wa Ngarama, mu Karere ka Gatsibo, bavuga ko bizeye ko abo batoye bazabahagararira neza, bakabavuganira kandi bagaharanira iterambere ry’aho batuye.

Gasasira Jean Bosco utuye mu Mudugudu wa Rugarama, avuga ko yizeye ko abayobozi batowe bazamenya ibikenewe mu baturage, bakamenya aho ibikorwaremezo bitaragera kandi bagaharanira iterambere ry’ubukungu n’imibereho myiza y’abaturage.

Ati "Bakwiye kutuvuganira, nkatwe mu mudugudu wacu umuriro ukatugeraho, tukarushaho kwihutisha iterambere."

Mukandori Aisha utuye mu Mudugudu w’Insinzi, avuga ko yitabiriye amatora agamije gutora abayobozi bazafasha Perezida wa Repubulika guteza imbere abaturage n’igihugu.

Yagize ati “Abatowe bazagirire igihugu n’abaturage akamaro, barinde abaturage ubusinzi n’ibindi bitabateza imbere. Bazumve ibyo tubatumye, babigeze ku Mukuru w’Igihugu kugira ngo na byo bitugereho, dukomeze kubaka Ngarama yacu n’igihugu cyacu.”

Mukamana Thereza watowe ku mwanya w'Umuhuzabikorwa w'Inama y'Igihugu y'Abantu bafite ubumuga mu Kagari ka Gacaca, Umurenge wa Rubengera mu Karere ka Karongi, yavuze ko azajya akorera ubuvugizi abafite ubumuga.

Ati "Mu bibazo bikibangamiye abantu bafite ubumuga mu kagari kacu ka Gacaca harimo kutabona kutabona inyunganirangingo n'insimburangingo ku buryo bworoshye, abarimu badafite ubumenyi ku rurimi rw'amarenga n'inyandiko y'abafite ubumuga bwo kutabona.”

Mukamana yavuze ko mu byo azibandaho harimo gushishikariza abantu bafite ubumuga gushaka icyo bakora kitari ugusabiriza, abafashe guhindura imyumvire kugira ngo bumve ko bashoboye, biteze imbere.

Kuri site y'Akagari ka Nyanza mu Murenge wa Busasamana mu Karere ka Nyanza bamaze gutora ibyiciro byihariye birimo abafite ubumuga, urubyiruko, hanatorwa abagore bazabahagararira muri 30%.

Nyirambonimpaye Evelyne witabiriye amatora yavuze ko yanyuzwe n’uko amatora yagenze.

Yagize ati "Tuzakomeza gufatanya natwe nk'abaturage, dukomeza kwitabira gahunda za leta nko kwizigamira muri Ejo Heza gutanga ubwisungane mu kwivuza, kwitabira inama n'ibindi.”

Uwitije Alice yavuze ko abatowe babifuzamo gukomeza kuba inyangamugayo birinda ruswa no kurenganya abaturage.

Yagize ati "Ntibikwiye kubona umuturage yimwa serivisi kuko atatanze ruswa. Bazadufashe icyo kintu cyirindwe.”

Kuri site ya Kibilizi, Umurenge wa Rubengera mu Karere ka Karongi, abagore bahatoreye komite nyobozi y'Inama y'Igihugu y'Abagore ku rwego rw'Akagari bashimye Leta y'u Rwanda ku gaciro yasubije umugore.

Basabye abo batoye kubakorera ubuvugizi ku bibazo bikibangamiye bamwe muri bo birimo amakimbirane yo mu ngo, igwingira ry'abana, abana bataye amashuri, abana baba ku muhanda n'ubukene. 

Uwizeye Antoinette yagize ati "Turasaba abo twatoye ko badukorera ubuvugizi ku nzego zibakuriye, ibi bibazo bigakemuka. Ikindi tubifuzaho ni uko bashyira imbaraga mu kubumbira hamwe abagore mu makoperative kugira ngo bakorere hamwe, bibafashe kwivana mu bukene.”

Muyenzi Boniface wo mu Mudugudu wa Ngoma yagize ati "Amatora yagenze neza cyane kuko twitoreye ab’ingirakamaro, ariko hari icyo mbasaba. Bazite ku guca umwanda ndetse no gushaka ikigabanya inzara mu baturage, batuvugire tubone ifumbire ku gihe, duhinge kiiyambere.”

Angeline Nyiramunanira ati “Hari aho mbona hakwiye umwotso. Kuri serivisi rwose bazatuvugire twe kujya dusiragizwa, batuvana aha batujyana hariya, ibi bazabyiteho.”

Abaturage bari gutorera kuri Site ya Kageyo iherereye mu Murenge wa Mwiri mu Karere ka Kayonza bamaze gutora abagore bazabahagararira muri 30%.

Uwizeye Phiona yavuze ko icyo asaba abatowe ari ukubabera urugero rwiza ku kubaka ingo zikomeye.

Yagize ati “Njye icyo nabasaba ni uko baduha urugero rwiza mu kubaka ingo nziza kandi zikomeye. Muri iyi minsi ntabwo byoroshye cyane cyane mu bantu bari kubaka ingo, turifuza rero ko abo twatoye bashyiraho uburyo bwo kuganiriza urubyiruko n’ingo zibanye mu makimbirane.”

Amatora ari kubera kuri site y’itora ya G.S Cyangugu mu Kagari ka Cyangugu, Umurenge wa Kamembe, Akarere ka Rusizi, yatangijwe no kwerekana abatowe ku rwego rw'imidugudu, hatorwamo batandatu bahagarira abandi muri njyanama y'akagari.

Hahise kandi hatorwa umugore uhagarariye abandi mu kagari n’abagabo bahatanira imyanya mu Nama Njyanama y’Akagari.

Umujyanama uhagarariye abagore mu Nama Njyanama y’Umurenge, abagize Biro y’Inama Njyanama y’Akagari, ndetse na Komite Nyobozi z’Inama Njyanama ku rwego rw’Akagari na bo batowe.

Amatora yabereye kuri site y’itora ya Ngarama, mu Kagari ka Ngarama, Umurenge wa Ngarama, Akarere ka Gatsibo, yatangijwe no kwerekana abatowe ku rwego rw'imidugudu, imyanya itandukanye iri butorerwe n’abakandida bahatanira kujya mu Nzego z’Inama Njyanama.

Abatora kandi bongeye kwibutswa inzego bagombaga gutoreramo, zirimo abahagarariye ibyiciro by’abagore n’abagabo mu Nama Njyanama y’Akagari, Umujyanama uhagarariye Akagari mu Nama Njyanama y’Umurenge, abahagarariye abagore mu Nama Njyanama y’Umurenge, abagize Biro y’Inama Njyanama y’Akagari ndetse na Komite Nyobozi z’Inama Njyanama ku rwego rw’Akagari.

Ibi byari bigamije gufasha abatora gusobanukirwa imyanya itorerwa kugira ngo bashobore guhitamo abakandida babona bazabafasha mu iterambere ry’Akagari n’Umurenge wabo.

Meya w’Umujyi wa Kigali, Dusengiyumva Samuel, yatoreye mu Karere ka Kicukiro ku Rwunge rw’Amashuri rwa Busanza.

Ku batoreye mu Karere ka Kicukiro ku Rwunge rw’Amashuri rwa Busanza, babanje gucinya akadiho, bishimira ko bafite uburenganzira busesuye bwo kwitorera abayobozi.

Mu bagize Inama Njyanama itorwa, 30% bagomba kuba ari abagore. Mbere y’amatora, bagomba kubanza kwiyamamaza.

Perezida w’Inteko Ishinga Amategeko Umutwe w’Abadepite, Gertrude Kazarwa, ni umwe mu batoreye ku Ishuri rya Kigali Christian riherereye mu Murenge wa Kibagabaga. Yari kumwe na Minisitiri w'Uburinganire n'Iterambere ry'Umuryango, Uwimana Consolée.

Umunyamabanga wa Leta muri Minisiteri ya Siporo, Rwego Ngarambe, ni umwe mu bitabiriye aya matora

Mbere yo gutora, abashinzwe ibikorwa by’amatora babanza kurahirira kuzuza neza inshingano zabo

Minisitiri w'Uburinganire n'Iterambere ry'Umuryango (MIGEPROF) mu Rwanda ni Consolée Uwimana, ni umwe mu bitabiriye aya matora. Yatoreye mu Murenge wa Kimironko mu Kagari ka Kibagabaga.

Dr Edouard Ngirente wahoze ari Minisitiri w’Intebe ni umwe mu bitabiriye amatora yo ku rwego rw’umudugudu. Yatoreye mu Murenge wa Kigarama mu Karere ka Kicikiro mu Kagari ka Bwerankori. 

Abanyarwanda baramukiye mu bice bitandukanye by’igihugu mu matora yo ku rwego rw’Akagari akurikira ayo ku rwego rw’Umudugudu yabaye ku wa 24 Ukwakira.

Nyuma y’aya matora, hateganyijwe n’ayo ku rwego rw’Umurenge ku wa 7 Ugushyingo. Intego ni ugushyiraho abahagararira abaturage mu nzego zibegereye, bakagira uruhare mu kugeza ibibazo n’ibyifuzo byabo mu buyobozi. Aya matora akubiyemo imyanya itandukanye; ntabwo ari ugutora umuntu umwe gusa uyobora Akagari.

Ku rwego rw’Akagari, huzuzwa Inama Njyanama kandi hagatorwa abayihagararira n’izindi nzego. Inama Njyanama y’Akagari igizwe n’umujyanama umwe uhagarariye buri Mudugudu, abajyanama b’abagore bagomba gutuma abagore baba nibura 30% by’abayigize, abahuzabikorwa b’Inama z’Igihugu z’Abagore, Urubyiruko n’Abantu bafite Ubumuga, ndetse n’abahagarariye ibyiciro birimo abikorera n’uburezi. 

Abajyanama rusange bahagarariye Imidugudu baba baratowe ku rwego rw’Umudugudu; ku Kagari hakuzuzwa indi myanya iteganyijwe, hagatorwa na Biro y’Inama Njyanama.

Komisiyo y’Igihugu y’Amatora isobanura ko abajyanama b’abagore bagize nibura 30% by’Inama Njyanama y’Akagari batorwa n’abaturage bose b’Akagari bemerewe gutora. Naho umujyanama uhagararira Akagari mu Nama Njyanama y’Umurenge atorwa n’abagize Inama Njyanama y’Akagari. 

Abahagarariye ibyiciro byihariye batorwa hakurikijwe icyiciro bahagarariye n’amabwiriza abigenga.

Hari kandi amatora y’inzego zihagarariye abagore, urubyiruko n’abantu bafite ubumuga ku Kagari. Komite Nyobozi y’Inama y’Igihugu y’Abagore n’iy’Abantu bafite Ubumuga zigizwe n’abantu barindwi buri imwe, naho iy’Urubyiruko ikagira icyenda. 

Amatora y’inzego z’abantu bafite ubumuga ahera ku Kagari, mu gihe ay’abagore n’urubyiruko ahera ku Mudugudu. Hatorwa kandi abakandida babiri b’abagore bazatoranywamo abajyanama b’abagore ku rwego rw’Umurenge; gutorwa nk’umukandida kuri uru rwego ntibihita bisobanura ko umuntu yamaze kuba umujyanama w’Umurenge.