Iki gihembo kigaragaza umuhate wa Kaminuza ya Kigali mu gukorera mu mucyo mu micungire y’imari, kubazwa inshingano, imiyoborere myiza y’imari no gutanga raporo z’imari zujuje ubuziranenge.

Kigaragaza kandi ko yiyemeje gucunga umutungo wayo mu buryo burambye kandi burangwa n’ubunyamwuga.

Igihembo cyashyikirijwe Umuyobozi ushinzwe Imari muri Kaminuza ya Kigali, CPA Edwin Mungai Waithaka, mu muhango wabereye muri Paramount Hotel i Kigali, wari ufite insanganyamatsiko igira iti “Guteza imbere gukorera mu mucyo no kuramba mu itangwa rya raporo z’imari hagamijwe iterambere ryuzuye kandi rirambye.”

Ibi bihembo ngarukamwaka bihabwa ibigo n’imiryango byo mu nzego zitandukanye bigaragaza ubunyamwuga mu gutanga raporo z’imari, kubazwa inshingano, imiyoborere myiza n’imikorere irambye.

Ku bigo by’amashuri makuru na za kaminuza, gutanga raporo z’imari zinoze birenze kubahiriza ibisabwa n’amategeko.

Ni inkingi y’ingenzi mu igenamigambi, gukoresha neza umutungo, kubazwa inshingano mu micungire y’imari, kubaka icyizere cy’abafatanyabikorwa no gukomeza iterambere rirambye ry’ikigo.

Amakuru y’imari yizewe kandi atangwa ku gihe afasha abayobozi n’inzego z’imiyoborere gufata ibyemezo bishingiye ku makuru afatika, bityo akongera icyizere cy’abafatanyabikorwa, inzego zigenzura, abakozi, abanyeshuri n’abandi bafitanye isano na Kaminuza.

Umuyobozi Mukuru wa Kaminuza ya Kigali, Prof. George Kimathi, yavuze ko iki gihembo kigaragaza umuhate w’iyi kaminuza mu kubaka ikigo kirangwa n’imiyoborere myiza, kubazwa inshingano n’ubunyamwuga.

Yagize ati “Iki ni ikimenyetso cy’umuco wo kubazwa inshingano, gukorera mu mucyo no guharanira ubunyamwuga dukomeje kubaka muri Kaminuza ya Kigali. Gucunga neza umutungo w’imari si ugutegura raporo zinoze gusa; ahubwo ni ukureba ko buri mutungo kaminuza ishinzwe ucungwa neza kandi ukagira uruhare mu gushyigikira intego zayo mu burezi no mu iterambere rirambye ryayo.”

Yongeyeho ko imicungire myiza y’imari ari ingenzi mu gushyigikira intego za Kaminuza zo guhindura uburezi bukagira uruhare mu iterambere ku rwego mpuzamahanga.

Iki gihembo kigaragaza kandi uruhare rukomeye rw’ishami rishinzwe imari muri kaminuza mu gushimangira igenzura ry’imbere mu kigo, igenamigambi ry’imari, uburyo bwo gutanga raporo, kubahiriza amabwiriza, gucunga ibyateza igihombo no gukoresha umutungo mu buryo bushyize mu gaciro.

Umuyobozi ushinzwe Imari muri Kaminuza ya Kigali, CPA Edwin Mungai Waithaka, yavuze ko iki gihembo kigaragaza ishoramari kaminuza ikomeje gukora mu guteza imbere imyitwarire myiza mu micungire y’imari, kubazwa inshingano no gutanga raporo zinoze.

Yagize ati “Gutanga raporo z’imari ni imwe mu nkingi z’ingenzi zituma ikigo kibazwa inshingano. Muri Kaminuza ya Kigali, twiyemeje gukora raporo z’imari n’uburyo tuzikoramo bitanga amakuru y’ukuri, ku gihe kandi mu mucyo, afasha mu gufata ibyemezo no kongera icyizere cy’abafatanyabikorwa.”

“Iki gihembo kiduteye imbaraga nk’itsinda ndetse nk’ubuyobozi, zo gukomeza kunoza igenzura ry’imari, amahame agenga itangwa rya raporo n’imiyoborere y’imari.”

Gutanga raporo z’imari zinoze bigira uruhare rukomeye mu gukomeza ibigo ndetse n’ubukungu muri rusange.

Amakuru y’imari atangwa mu mucyo kandi yizewe ashobora kongera icyizere cy’abashoramari n’abafatanyabikorwa, koroshya kubona inkunga y’imari, gushimangira iyubahirizwa ry’amategeko, kugabanya ibyago byo gucunga nabi umutungo no gufasha mu kuwugabanya mu buryo bunoze.

Kuri za kaminuza, aya mahame ni ingenzi cyane kuko hacungwa ishoramari rinini rigenerwa porogaramu z’amasomo, ibikorwa remezo, ikoranabuhanga, ubushakashatsi, abakozi n’serivisi zihabwa abanyeshuri.

Imiyoborere myiza y’imari ishobora gufasha ikigo gukomeza gutanga uburezi bufite ireme mu buryo burambye.

Iki gihembo kije mu gihe Kaminuza ya Kigali ikomeje guteza imbere Ishami ry’Amasomo y’Ubunyamwuga n’Amahugurwa y’Abayobozi (School of Professional and Executive Programmes), rigamije kwagura amahirwe ku banyeshuri, abanyamwuga n’abakozi bifuza gukomeza amasomo no gutera imbere mu mwuga wabo.

Binyuze muri aya masomo, kaminuza ifasha abiga gukurikirana amahugurwa y’inyongera mu myuga agengwa n’inzego zibifitiye ububasha, harimo n’Urugaga rw’Ababaruramari b’Umwuga mu Rwanda (ICPAR).

Kaminuza ya Kigali ikomeje gukorera mu murongo w’amahame n’amabwiriza agenga imyuga kugira ngo itange amahirwe yo kwiga afasha abanyeshuri kubona ubumenyi ngiro, ubushobozi bwa tekiniki n’ubumenyi bujyanye n’ibikenewe ku isoko ry’umurimo rihora rihinduka.

Mu gihe Kaminuza ikomeza kwagura amasomo y’ubunyamwuga n’amahugurwa y’abayobozi, yiteguye kwakira abanyeshuri n’abanyamwuga biteguye gutera intambwe ikurikira mu rugendo rwabo rw’amasomo n’umwuga.

Kaminuza ya Kigali ihawe iki gihembo mu gihe ikomeje kwagura no kunoza porogaramu z’amasomo, ubushakashatsi no guhanga ibishya, ubufatanye n’ibindi bigo, ibikorwa remezo, amasomo y’ubunyamwuga n’uburyo bw’imikorere y’ikigo.