Raporo ya NISR ku ihindagurika ry’ibiciro mu nganda yo muri Nzeri 2026 igaragaza ko ibiciro byo mu nganda zitunganya amabuye y’agaciro byazamutseho 56,9% ku mwaka, mu gihe ibyo mu nganda zikora ibintu bitandukanye byiyongereyeho 21,2%.

Ugereranyije na Kanama 2026, ibiciro rusange byo mu nganda byazamutseho 2,9%. Iri zamuka ryatewe n’ibiciro byo mu nganda zikora ibintu bitandukanye byiyongereyeho 3,3%, mu gihe ibyo mu zitunganya amabuye y’agaciro byagabanutseho 1,5%.

Ku bicuruzwa bigurishwa imbere mu gihugu, ibiciro byo mu nganda byazamutseho 22,2% ugereranyije na Nzeri 2025. Byatewe ahanini n’izamuka rya 24,4% ry’ibiciro byo mu nganda zikora ibintu bitandukanye.

Ugereranyije na Kanama 2026, ibiciro by’ibikorerwa mu nganda bigurishwa imbere mu gihugu byiyongereyeho 3,2%, ahanini bitewe n’ibyo mu nganda zikora ibintu bitandukanye byazamutseho 3,5%.

Ku ruhande rw’ibicuruzwa byoherezwa mu mahanga, ibiciro byo mu nganda byazamutseho 17,3% ugereranyije na Nzeri 2025.

Iri zamuka ryatewe ahanini n’ibiciro byo mu nganda zitunganya amabuye y’agaciro byiyongereyeho 56,9%, mu gihe ibyo mu nganda zikora ibintu bitandukanye byagabanyutseho 14,1%.

Ugereranyije na Kanama 2026, ibiciro by’ibicuruzwa byoherezwa mu mahanga byazamutseho 0,3%. Ibyo mu nganda zikora ibintu bitandukanye byiyongereyeho 2,1%, mu gihe ibyo mu zitunganya amabuye y’agaciro byagabanyutseho 1,5%.

Igipimo cy’izamuka ry’ibiciro rusange byo mu nganda ku mwaka cyari kuri 21,1% muri Kanama 2026, kigera kuri 21,5% muri Nzeri.

NISR isobanura ko iyi raporo ngarukakwezi ishingira ku giciro fatizo gihabwa nyiri igicuruzwa cyangwa utanga serivisi, hatarongerwaho andi mafaranga arimo imisoro n’ay’ubwikorezi.