Icyemezo cyo gushyiraho Mohamed Ag Ayoya cyatangajwe ku wa 18 Ugushyingo 2026, nk’uko bikubiye mu itangazo ryashyizwe ahagaragara n’Umuryango w’Abibumbye.
António Guterres yashimiye Amb. Valentine Rugwabiza ku buyobozi bwiza yagaragaje mu gihe yari ayoboye MINUSCA, bwagize uruhare mu gufasha Centrafrique gutera intambwe zikomeye mu rugendo rwo kugarura amahoro n’umutekano.
Muri izo ntambwe harimo gutegura no gukora amatora yahurijwe hamwe ku rwego rw’igihugu, kwambura intwaro imitwe yitwaje intwaro, guteza imbere ibiganiro by’amahoro no gushimangira umutekano.
Mohamed Ag Ayoya ugiye gusimbura Amb. Rugwabiza afite uburambe bw’imyaka irenga 25 mu bijyanye n’amahoro n’umutekano, ibikorwa by’ubutabazi, guhangana n’ibibazo by’ingutu n’ubufatanye mu iterambere.
Kuva muri Mutarama 2023, yari asanzwe ari Umuyobozi Wungirije wa MINUSCA, akaba n’Umuhuzabikorwa w’Ibikorwa by’Umuryango w’Abibumbye n’iby’Ubutabazi muri Centrafrique.
Mbere yo kujya muri Centrafrique, Ayoya yari yarakoze imirimo itandukanye mu Ishami ry’Umuryango w’Abibumbye ryita ku Bana (UNICEF), aho yabaye umuhagarariye muri Afghanistan hagati ya 2022 na 2023, muri Somalia kuva mu 2021 kugeza mu 2022, muri Sudani y’Epfo hagati ya 2019 na 2021, muri Zimbabwe kuva mu 2016 kugeza mu 2019 no muri Guinée hagati ya 2013 na 2016.
Mu gihe yakoreraga muri Guinée, yagize uruhare mu kuyobora ibikorwa bya UNICEF byo guhangana n’icyorezo cya Ebola cyibasiye Afurika y’Uburengerazuba.
Yanakoze mu bihugu birimo Haïti, u Buhinde, Sierra Leone, Mali, Niger, Tchad na Mauritanie, aho yagize uruhare mu gushyira mu bikorwa gahunda zo guteza imbere imibereho n’ubuzima bw’abana.
Mohamed Ag Ayoya afite impamyabumenyi mu buvuzi yakuye muri Kaminuza ya Bamako muri Mali, ndetse n’impamyabumenyi y’ikirenga (PhD) mu bijyanye n’imirire yakuye muri Kaminuza ya Cornell muri Leta Zunze Ubumwe za Amerika.
Amb. Valentine Rugwabiza yari yarashyizwe kuri uyu mwanya ku wa 23 Gashyantare 2022, n’Umunyamabanga Mukuru w’Umuryango w’Abibumbye, António Guterres, asimbuye Umunya-Sénégal Mankeur Ndiaye. Mbere yo guhabwa izi nshingano, yari asanzwe ari Ambasaderi w’u Rwanda mu Muryango w’Abibumbye.






Ibitekerezo 0