Ni muri urwo rwego IGIHE ibakusanyiriza ahantu ho gusohokera mu minsi y’ikiruhuko, by’umwihariko ahaba hateganyijwe ibitaramo.

Atome agiye gutaramira ab’i Kigali

Umuhanzi akaba n’umukinnyi wa filime, Ntarindwa Diogène uzwi nka Atome, agiye gukinira i Kigali umukino yise “Carte d’Identité – Identity Card”.

Ni umukino azakinira mu gitaramo giteganyijwe kubera muri Kigali Convention Centre (KCC) ku wa 7 Ugushyingo 2026.

Iki gitaramo kizaba kibimburiye uruhererekane rw’ibitaramo yise ‘Legacy Series’, ateganya gukorera mu mijyi itandukanye irimo Kigali, Dakar, Abidjan, Paris, Bruxelles, Genève, Stockholm na Montréal.

Kid From Kigali na Mike Kayihura muri Atelier du vin

Abahanzi n’abavangamiziki barimo KidFromKigali, Mike Kayihura, DJ Consultant, Selekta Faba, DJ Julzz na DJ Chris, bagiye guhurira mu gitaramo cyiswe The Resonance, kizaba ku wa 7 Ugushyingo 2026, muri Atelier du Vin i Kigali.

Ni igitaramo kigamije guhuza abakunda umuziki no kubaha umwanya wo kwidagadura binyuze mu njyana zitandukanye.

Kigali Universe yashyize igorora abakunzi ba sinema

Kigali Universe yongeye gushyira igorora abakunzi  ba sinema mu ijoro ryiswe “Flick Movie Night”, kiba kuri uyu wa 5 Ugushyingo 2026.

Muri uyu mugoroba byitezwe ko herekanwa filime ebyiri “This Is the End” na “Insidious: Out of the Further”. 

Iwacu Comedy igihe kubera i Bugesera

Abanyarwenya 10 barimo Seth Seka, Joshua, Umushumba, Pirate, Muhinde, Rumi, Kadudu, Mtsi, Luck Baby, Inkirigito Clement na Rufendeke, bagiye guhurira mu gitaramo cy’urwenya cyiswe ‘Iwacu Comedy Show’.

Iki gitaramo bitegerejwe kubera ahitwa Palast Rock Hotel i Nyamata ku wa 6 Ugushyingo 2026, kigamije guha abakunzi b’urwenya umwanya wo kwidagadura no gususurutswa n’abanyarwenya batandukanye, bakazerekana impano zabo binyuze mu nkuru n’ibikorwa bisekeje. 

Logan Joe agiye gutaramira i Musanze

Logan Joe uri mu bahanzi bagezweho muri iyi minsi, agiye gutaramira abakunzi be mu gitaramo yise “Ignition Night”, kizabera muri City Snack Lounge i Musanze ku wa 7 Ugushyingo 2026.

Logan Joe akunzwe cyane mu ndirimbo zirimo ‘Whatever’ yakoranye na Kivumbi King, ‘Kibonumwe’, ‘Treasure’ iri mu zo yakoze zigakundwa cyane ndetse na ‘Part of Me’ aherutse gusohora.

Christopher i Kampala

Christopher Muneza agiye gutaramira abakunzi b’umuziki i Kampala muri Uganda, mu gitaramo ‘Code 250’ kizaba ku wa 6 Ugushyingo 2026, mu kabari kitwa ‘Black Panther’.

Iki gitaramo kizahuriza hamwe abahanzi n’abavangamiziki batandukanye barimo Slick Stuart, DJ Roja, Selector Jay, DJ Mato, DJ Kerb, Viana Indi, Morgan MC na Topboy MC. 

Christopher azataramira abakunzi be mu ndirimbo zitandukanye zamamaye mu rugendo rwe rw’umuziki zirimo ‘Mi Casa’, ‘Nibido’ na ‘Iri Joro’ yakoranye na Danny Nanone. 

Uyu muhanzi azagira n’umwanya wo kuririmbira abakunzi be indirimbo zirimo ‘Nzaza’ yakoranye na Massamba Intore, iri kuri album ye nshya yise H₂O.

Iyi album igizwe n’indirimbo icyenda zirimo ‘Ndicuza’, ‘Vole’, ‘POZ’, ‘Belong To Me’ na ‘Right Here’ yakoranye na Spin na Kivumbi King.

Juno Kizigenza na Bwiza bagiye gutaramira i Bugesera

Banki ya Kigali (BK) igiye gukomereza ibirori byo kwizihiza imyaka 60 imaze ikorera mu Rwanda, mu birori bizahurirana n’umukino uzahuza Bugesera FC na Al Hilal SC yo muri Sudani, uteganyijwe ku wa 7 Ugushyingo 2026, kuri Stade ya Bugesera.

Uyu mukino uzatangira saa cyenda z’amanywa (15:00) mu gihe abazawitabira bazasusurutswa na Bwiza uzaba ataramira iwabo ari kumwe na Juno Kizigenza.

Selah Concert III

Itsinda rikora indirimbo zo kuramya no guhimbaza Imana rya New Melody rigiye kongera gutaramira abakunzi baryo mu gitaramo cyiswe “Selah Concert III”, kizaba tariki ya 8 Ugushyingo 2026, muri Camp Kigali.

Iki gitaramo kizahuza abaririmbyi bagize New Melody, bakazataramira abazacyitabira mu ndirimbo zitandukanye zibanda ku kuramya Imana, kuyihimbaza no gukomeza imitima y’abayizera.