{Minisitiri w’Intebe akaba na Komiseri muri FPR Inkotanyi, Dr. Pierre Damien Habumuremyi, kuwa 10 Gicuransi 2014, yagarutse ku bikwiye kuranga Umuyobozi nyawe, byongeye nk’umunyamuryango wa FPR Inkotanyi ufite indangagaciro zimuranga.}

Dr Habumuremyi yagejeje ikiganiro ku banyamuryango ba FPR Inkotanyi bo mu Ntara y’Amajyaruguru mu Nteko Rusange idasanzwe yabereye mu Karere ka Rulindo.

Yibutsa ibintu bine umuyobozi nyawe atagomba kwibagirwa, Minisitiri w’Intebe yagaragaje ko hari ibintu bine bigomba kuranga umuyobozi: “Kubungabunga umutekano w’abaturage, kubaba hafi, kumenya ibyo bifuza no gukorera inyungu zabo.”

Yasabye abayobozi ko bagomba kubungabunga umutekano w’abaturage bashinzwe kuyobora, kandi bakitandukanya n’icyo ari cyo cyose cyabashora mu kugambanira igihugu no gukorana n’umwanzi. Mu minsi ishize hari abayobozi mu nzego z’ibanze mu Ntara y’Amajyaruguru batawe muri yombi bakekwaho gukorana na FDLR, bakanagira uruhare mu iterwa rya gerenade zahitanye ubuzima bw’abaturage.

Yibukije aba bayobozi bo mu Ntara y’Amajyaruguru ko bagomba kumenya ibyo abaturage bakeneye, anabibutsa ko bisaba kubana nabo, kuko ntashobora kumenya ibibazo umuturage afite atahabana.

Yakomeje yihanangiriza abayobozi batarara mu mirenge cyangwa Utugari bayobora n’abafata ingendo bakajya kure batamenyesheje abayobozi babo, abibutsa ko atari ukubagenzura ahubwo ko byoroshya akazi kuko bashobora gukenerwa bakabura kuko akazi k’Umuyobozi katagira amasaha.

Dr. Habumuremyi avuga ku gukorera inyungu z’abaturage aho kwigwizaho imitungo yagize ati“Kuki mutanyurwa n’imyanya mufite ngo mukorere abaturage kandi mwaragiriwe icyizere muri miliyoni 11 zose zituye iki gihugu, mugira ngo se abandi bo ntibashobora kuba abayobozi?”

Yibukije kandi ko abayobozi batagomba kwirengagiza gutanga umusaruro, kuko imyanya bafite ariyo gukorera abaturage no guteza igihugu imbere atari iyo kwicaramo gusa.

Muri iyi Nteko kandi hanenzwe bamwe mu bayobozi b’abanyamuryango ba FPR Inkotanyi bagaragaye mu bikorwa byo gukorana na FDLR.

Umuyobozi w’umuryango FPR mu Ntara y’Amajyaruguru yavuze ko abatatiye igihango bakishora mu bikorwa byo gukorana n’umwanzi, ntibari abanyamuryango ba nyabo, kuko bakwiye kugawa kandi hagakorwa ibishoboka ngo bitazongera kubaho ku bandi mu Nntara y’Amajyaruguru yari igeze aheza mu iterambere.

Iyi nama yitabiriwe na komite nyobozi y’umuryango, komite ngenzuzi ku ntara, komite ya discipline, urugaga rw’urubyiruko, urugaga rw’abagore n’abanyamabanga nshingwabikorwa.

Kanda hano urebe andi mafoto
Amafoto/Primature