Iyi Shampiyona yari imaze iminsi itanu, yasojwe kuri iki Cyumweru, tariki ya 25 Ukwakira 2026, hakinwa isiganwa ryo mu muhanda ry’abagabo bakuru n’abatarengeje imyaka 23 ku ntera y’ibilometero 153.

Umunya-Afurika y’Epfo Callum Ormiston ni we waryegukanye akoresheje amasaha atatu, iminota 44 n’amasegonda abiri, akurikirwa n’Umunya-Maroc Driss El Alouani yarushijwe amasegonda 20, mu gihe Umunya-Eritrea Hebron Berhane yabaye uwa gatatu arushwa amasegonda 34.

Mu Banyarwanda, Nsengiyumva Shemu ni we witwaye neza kurusha abandi asoza ku mwanya wa karindwi, mu gihe Niyonkuru Samuel yabaye uwa munani. Bombi bageze ku murongo nyuma y’amasegonda 43 uwari wegukanye isiganwa ahageze.

Uwiduhaye Mike yabaye uwa 18 arushwa iminota itatu n’amasegonda 44, naho Mugisha Moïse aba uwa 20 arushwa iminota itatu n’amasegonda 47.

Mu bandi Banyarwanda bari muri iri siganwa, Muhoza Eric na Masengesho Vainqueur ntibashoboye kurisoza. Mu batarengeje imyaka 23, Ufitimana Shadrack, Ntirenganya Moïse na Ruhumuriza Aimé na bo ntibageze ku murongo usoza.

Isiganwa ryo kuri iki Cyumweru ryari ryitabiriwe n’abakinnyi 128. Muri bo, 18 ntibatangiye, 45 ntibarisoza naho 28 barisoje barengeje igihe cyagenwe.

Nubwo u Rwanda rutabonye umudali ku munsi wa nyuma, rwasoje iyi Shampiyona ruri ku mwanya wa kabiri muri rusange n’imidali itandatu, irimo itatu ya Zahabu, umwe wa Feza n’ibiri y’Umuringa.

Afurika y’Epfo ni yo yayoboye urutonde n’imidali 13, irimo itanu ya Zahabu, itanu ya Feza n’itatu y’Umuringa.

Uko u Rwanda rwegukanye imidali yarwo

Imidali itatu ya Zahabu yabonetse mu gusiganwa n’igihe ku giti cy’umukinnyi.

Masengesho Yvonne yabaye uwa mbere mu bakobwa batarengeje imyaka 19 nyuma yo gukoresha iminota 15, amasegonda 37 n’ibice 193 ku ntera y’ibilometero 10,2.

Mwamikazi Jazilla yegukanye Zahabu mu bagore batarengeje imyaka 23, akoresha iminota 31, amasegonda 17 n’ibice 581 ku ntera y’ibilometero 20,4.

Ingabire Diane na we yabaye Nyampinga wa Afurika mu gusiganwa n’igihe mu bagore bakuru, akoresha iminota 31, amasegonda abiri n’ibice 742 ku ntera y’ibilometero 20,4.

U Rwanda kandi rwabonye umudali wa Feza binyuze kuri Agasaro Gloria wabaye uwa kabiri mu isiganwa ryo mu muhanda ry’abakobwa batarengeje imyaka 17, naho Liza Jehovaire aba uwa gatatu, ahesha igihugu umudali w’Umuringa.

Undi mudali w’Umuringa wabonetse mu gusiganwa n’igihe kw’amakipe avanze. Ikipe y’u Rwanda yari igizwe na Muhoza Eric, Nsengiyumva Shemu, Tuyizere Etienne, Nirere Xaveline, Ingabire Diane na Mwamikazi Jazilla yabaye iya gatatu inyuma ya Afurika y’Epfo n’Ibirwa bya Maurice.

Urutonde rw’ibihugu byegukanye imidali

1. Afurika y’Epfo: Zahabu 5, Feza 5, Umuringa 3 — yose hamwe 13
2. U Rwanda: Zahabu 3, Feza 1, Umuringa 2 — yose hamwe 6
3. Mauritius: Zahabu 2, Feza 3 — yose hamwe 5
4. Zimbabwe: Zahabu 2 — yose hamwe 2
5. Algeria: Zahabu 1, Feza 2, Umuringa 2 — yose hamwe 5
6. Eritrea: Zahabu 1, Feza 1, Umuringa 1 — yose hamwe 3
7. Sénégal: Zahabu 1 — yose hamwe 1
8. Misiri: Feza 2, Umuringa 1 — yose hamwe 3
9. Maroc: Feza 1 — yose hamwe 1
10. Ethiopia: Umuringa 3 — yose hamwe 3
11. Uganda: Umuringa 2 — yose hamwe 2
12. Kenya: Umuringa 1 — yose hamwe 1.