Ni umuhango wabereye muri Kigali Convention Centre witabirwa n’abanyamuryango n’abayobozi b’Umuryango FPR Inkotanyi, abahanzi babanye na we mu bikorwa byo kwiyamamaza, abahagarariye amashyaka yifatanyije na FPR ndetse n’urubyiruko rwiganjemo urukoresha imbuga nkoranyambaga.

Perezida Kagame yashimiye abitanze bose ngo ibikorwa byo kwiyamamaza bigende neza.

Ati “Ndagira ngo mbashimire mu izina rya RPF, ry’Abanyarwanda ndetse mbashimire uko twafatanyije. Buriya biriya tuvuga 100% ndetse tukaba twarabigezeho, 99 n’ibindi bice, uba wageze ku 100%. Impamvu biba 100%, harimo n’abayoboke b’imitwe ya politiki dukorana. Ndagira ngo by’umwihariko mbashimire.”

Perezida Kagame yakomeje avuga ko afite icyizere ko akazi kari imbere nyuma yo gutsinda amatora na ko kazagenda neza.

Ati “Ubushize nababwiye ko igikorwa cy’ingenzi tumazemo hafi ukwezi cyagenze neza, hasigaye ibiri imbere, by’umurimo, byo gukora ndetse dushakamo imbaraga nyinshi zirenze izo tumaze gukoresha mu bikorwa turangije ariko sinshidikanya ko na byo bizashoboka kandi bizoroha bitewe n’ubushake, imbaraga n’uko u Rwanda rwacu rwanyuze muri byinshi, mu bibi, biriya bihora bigaruka mu bitekerezo byacu, mu byo dukora byose ko u Rwanda rutasubira mu byo twanyuzemo."

Uyu muhango ubaye nyuma y’uko Komisiyo y’Igihugu y’Amatora itangaje ko ibyavuye mu matora by’agateganyo bigaragaza ko Perezida Kagame yatsinze ku majwi 99.18%, yakurikiwe na Dr. Frank Habineza wa Democratic Green Party of Rwanda wagize 0.50%, mu gihe Mpayimana Philippe wiyamamaje nk’umukandida wigenga yagize amajwi 0.32%.